Ka jingïapynbeit ïa u pud u sam ka long ka kam kaba kongsan tam hapdeng ki ar jylla kata ka Meghalaya bad Assam bad donkam ka jingïatrei lang jong baroh ki seng saiñ pyrthei ym ban shu ïalap miet ka jingïakynnoh bad ïa kawang ktieh namar kane kam poi shano shano ruh.
Sanphew tylli ki snem ki la ïaid naduh ba la ïoh ïa ka jylla Meghalaya ba pura, hynrei haduh mynta ym pat lah ban ïa pynbeit ïa u pud u sam. Ka sorkar Meghalaya ka la pyrshang na ka por sha ka por ban ïakren bad ka Assam hynrei kaba khatduh ka sahkut tang ha ka jingïakren khlem lah ban pyndep da ka kam. Ngi kynmaw ba ïa kane ka kam la shim khia bha da I Bah E.K Mawlong (Bam Kwai ha Dwar U Blei) ha ka por ba i long Myntri Rangbah ïa ka jylla Meghalaya bad ïa ka Assam pat da u Prafulla Kumar Mahanta. Ha katei ka por la ïa leit jurip da ki ar myntri rangbah sha kylleng ki bynta khappud jong ki ar jylla da ka helikopter. Hynrei sniewbok ba wan poi noh ka election ha Assam bad ba u Prafulla u khlem wan phai shuh ha ka bor kumta kane ka kam ka la sahteng biang noh. Ban da dei ba u dang jop biang tharai naduh kato ka por la ïa beit u pud u sam namar u Prafulla ruh u kwah bha ban pynbeit ïa u pud u sam kata da kaba ïa ai bad ïashim mar mylliang.
Hadien kane la wan noh ka jingsynshar ka seng Congress ha Assam bad ha Meghalaya ruh. Hooid ki Myntri Rangbah naduh u S.C Marak, Dr D.D Lapang bad u Dr Mukul Sangma ki la leit ïakren halor u pud u sam hynrei ka kut noh tang ha ka jingïakren khlem da lah ban pyntrei da ka kam. Dei tad ha kane ka sorkar MDA hapoh ka jingïalam u Conrad K Sangma kum u Myntri Rangbah bad une u Myntri Rangbah ka Assam u Himanta Biswa Sarma ba kila shim khia biang ban pynbeit ïa kane ka jingïakajia pud hapdeng ki ar jylla. Ka bynta kaba nyngkong la dep ïa pynbeit bad kumba la rai naduh ki por ba mynshwa ban pynbeit ïa u pud da kaba ïa ai bad ïashim mar kylliang kumta ruh la ïaleh hi mynta tangba lada kheiñ kaba ïoh jingmyntoi bha ka dei ka Meghalaya namar kumba 90 % ki jaka puta ki la wan phai biang sha Meghalaya bad tang 10 % kiba leit sha ka Assam.
Hynrei ban shu ïa kynnoh khlem nongrim kam long kaba sngew tynnad. Ki nongïalam ka TMC ki dei ban tyngkan noh ïa ka ktien ka thylliej jongki ban ym pynheh nia hana ba ka sorkar MDA ka la ai lut ïa ki jaka puta sha Assam. Ym lah ban lait na kata ka jingïa ai bad ïashim mar kylliang hynrei kam long pat kumba la kynnoh bad ïalam bakla ïa ki paidbah. Ha ka jingshisha kaei kaba donkam ka dei ka jingiatrei lang khlem da buh ïa kata ka saiñ pyrthei ne ka politik hakhmat . Namar lada ym lah ban pynbeit mynta kane ka kam kan sa sahteng biang sa da ki phew snem bad ki ban mad ïa ki jingeh ki dei ki paid khappud. Ngi kiba im ha ki jaka bym ïa kajia bad ha sor ngin leh aiu namar ngim sngewthuh ïa kaei kaba u shiah u thar hynrei kito kiba pli ki paid khappud keiñ kiba mad ïa ki jingeh bad jingshah pyndik ha ki pulit ka Assam bad kiba shah klun jaka na ka por sha ka por kiba mad ïa ka jingkthang tam ha ka jingim jongki.
Lada dei ban duh khyndiat khynsoit ka jaka ruh kam lei lei ban ïa kaba ïai shah klun bad ïai shah knieh jubor namar bym don u pud u sam. Lada don u pud u sam bad lada jia ba don ba kyntur na Assam ka aiñ ka don ban tehlakam namar la don la u pud u sam hynrei kumba long mynta ka long laitlan bad lada ka Assam ka kyntur pud ruh ym lah ban leh ei ei ruh em.
Kumta kaba kongsan hi ka long to ïatrei lang halor kane ka kam da kaba buh shwa ïa ka party shadien bad buh ïa ka jaidbynriew hakhmat ban lah ban pynbeit ïa u pud u sam bad ba ki paid khappud kin lait na ki jingeh kiba khraw ba ki ïa kynduh na ka por sha ka por. Namar haba ym don u pud ki kynhun shim kabu ki bun ym tang ki pulit hynrei wat ki riew kieng atiar ruh ha ki thaiñ Block I bad II kumta to ai ka kti ka mon ka diang khang ba kane ka kam kan beit noh syndon shi rta junom. Namar ka Bynta kaba Ar jongka jingïapynbeit pud kan sdang noh shen tang hadien ka jingrakhe ïaka Sngi Laitluid ka ri India.
