Kumba 55% na ki briew kiba la lait im na ka jingshah sumar ha kita ki Intensive Care ne ICU ki ïoh ïa kita ki jingshitom ba ktah ïa ka jabieng bad jingmut jingpyrkhat jong ki, la shem ka jingwad bniah da ki stad wad bniah jong ka Britain.Ka jingwad bniah ïa ki 157 ngut ki nongpang hapoh ka University College Hospital, hapoh London, ka la shem ia kata ka jingbun jong kita ki briew ba bun jingmut jingpyrkhat, kyndeh mynsiem bad kata ka jingkulmar jingmut ba ktah ïa ka jabieng hadien ka jingshitom. Ka Critical Care Journal ka la batai ïa ki katto katne ki dawai ba don jingïadei bad kane ka jinglong kulmar jingmut hapoh hospital ha kaba la iohi kumba ki lah ban wanrah pat ïa kita ki jingeh ba kham neh slem na ka bynta ki nongpang. Na ka liang jong ki doktor ki kwah ban pyrshang ban pynduna ïa kita ki dawai ba ïadei bad ka jinglong kulmar jingmut bad pynkylla ïa ka jinglong jong ki nongpang hapoh kita ki Intensive Care.
Ka Dr Dorothy Wade, kaba long ka stad psychologist na ka University College London, ka la ong “Ka thong jong kine ki Intensive Care ne ICU ka long ban pyllait im ïa ki mynsiem briew, ban leh kat ïa kaei kaba donkam”. Tangba ka la ong, ka lah ban long ka jingjia kaba pynher syrngiew bad pynsheptieng ïa ki katto katne ki nongpang. Ka la bteng da kaba ong “Mar sien sdang ban kyndit bynriew bad tip briew, ki nongpang ki lah ban don ha kata ka jinglong ba sheptieng, da kaba pyrkhat ba ki la biej lane don kano kano ka jingïasylla ban tuh ïa ki dkhot met jong ki lane ban pynsaja ïa ki”.
Ka jingwad bniah ka la shem ba lai bnai hadien, 55% na ki 157 ngut ki nongpang ki don ïa ki katto katne ki jingshitom ba ktah ïa ka bor pyrkhat jong ki- kata 27% ki ïoh ïa kata ka jingkulmar khlieh bad jing bym sngew shngaiñ hadien ba la lait na ki jingshitom, 46% ki don ïa ka jingkhuslai jingmut jingpyrkhat bad 44% pat ki don ïa kata ka jinglong kyndeh ne angnud. Ka jingma na kaba ïoh ïa kine ki jingshitom ba ktah ïa ka bor pyrkhat ne jabieng ka nang jur da kaba shong eh halor haduh katno slem ki nongpang ki hap ban shah sumar bad hap dih ïa ki dawai, kum kito kiba la pyndonkam na ka bynta ban teh lakam ïa ka jingkiew jong ka blood pressure. Kito ki nongpang ki bym lah ban ïoh thiah bad phoh sniew rumar ruh ki don ha ka jingma na kane ka jingshitom ba ktah ïa ka bor pyrkhat jong ki.
Ka Dr. Wade ka la ong ba ka dap shisha da ka jinglyngngoh halor kane ka jingkiew jong ka jingdon ki briew ba ïoh ïa kane ka jingshitom ba ktah ïa ka bor pyrkhat ne jabieng. Ka la bynrap da kaba ong “Nalor ba ngi dang wad ïa ki lynti ban pynthymmai ïa kita ki rukom ai jingsumar da ki dawai jong ngi, ngi lah ruh ban donkam ban pynlut shuh shuh ïa ka por ha kaba ai jingsumar ia ki nongpang ba don jingktah ia ka bor pyrkhat bad wad ruh ia ki lad ki lynti na ka bynta ban khanglad ïa kata ka jingshitom khlieh jong ki briew hapoh kita ki Intensive Care Unit (ICU) ba lah ban ktah ïa ka jinglong jingim jong ki ha ki por ban wan”.
U Dr David Howell, uba long u clinical director jong ka crtitical care hapoh hospital, u la ong “Ka long kaba khuid ban ong ba ym shym la don kano kano ka jingshim khia bad jingbishar bniah ia kata ka jingktah ia ka bor pyrkhat ne jabieng na ka bynta kito kiba shah sumar ha ki ICU bad hadien ki jingshah sumar”. U la ong ba ka jingwad bniah ka la pyni ba ka jingnang bun shuh shuh jong kane ka jingeh bad uta u dak jingkylli ba heh bha mynta u long: “Kumno ngin lah ban pynbha ïa ka”.
