Pynbna u samla Soni Bareh ban ai reng ha elekshon MLA na Khliehriat ha u snem 2023

Khliehriat, Nailar 07 : U samla Soni Bareh, uba na ka shnong Rymbai East Jaiñtia Hills District, u la pynbna paidbah ba un ïakhun ïa ka election sha ka dorbar thaw aiñ, ka MLA Election ka ban long ha u snem 2023 bad un ïa ai reng na ka 6-Khliehriat Constituency, une u samla u la iehnoh ïa ka kam kum u General Secretary Eastern Region jong ka Jaiñtia Students Movement bad u la jied ban rung noh sha ka kam saiñ hima sima.
“Nga la pan bor na kiba heh jong ka seng ba kin pyllait ïa nga ba ngan ïakhun ïa kane ka election”ong u bah Soni Bareh, haba kren halor ka jing angnud ban iakhun ïa ka election, u la ong ba u kwah ban wanrah ïa ka jingkhuid ha ka synshar ka khadar “Namar kito kiba dang sdang ban ïoh vote, kiba la kynjoh ïa ka 18 snem mar syn tip ba ki la ioh thep vote, ki la pyrkhat beit ba kin sa ioh pisa, hynrei nga kwah bad angnud ban pynkylla noh ïa ka jingmut jingpyrkhat jong ki samla ba kin sngewthuh ba ka election hi kam dei ka pisa”.
“Haba ïohi ba ki don ki kyrtong (candidate) kiba la kynjoh ia ka 60 snem kyrta shaneng bad kum ba long mynta u don ruh u bah Kyrmen Shylla, uba dei uba dang samla, te nga ruh nga buh ka thong bad ka jingïakop (challenge) ban ïakhun para samla, namar nga ruh nga dang samla” ong u bah Soni Bareh.
U la kynyu ïa ki para samla ba kin rung sha ka politic da ka jingkhmih lynti ba ki samla ki lah ban wanrah ïa ka politic ne ke synshar khadar kaba khuid ba suba, ha kajuh ka por u bah Soni Bareh u pan ka jingkyrshan na ki paidbah jong ka 6-Khliehriat Constituency ban ailad ïa u ban poi sha ka thong ban dup lah ban shna ïa ka aiñ ban ïada ïa ka jaitbynriew.
“Na ka liang jong nga nga buh ka thong ba ngan wad ki lad ki lynti ban ioh ïa ka aiñ kaba skhem ban ïada ïa ka jaitbynriew, kumjuh ruh ba ki briew kiba duk kin ioh ïa ki skim bapher bapher bad ruh ba ki paidbah kin tip ba ki don shibun ki skim, kawei ruh ka thong jong nga ka long ban kyntiew ïa ka pule puthi hapoh ka district ban wanrah ïa ka college sorkar bad kiwei kiwei ki jait Institute hapoh ka district ban long kum ka lad ban kyntiew ïa ka roi ka par, ka ïoh ka kot” ong u bah Soni Bareh.