Ha ka Assembly yn rah ka Sorkar ïa ka kaiphod tohkit shah siat ïap u Bah Cheris

Shillong, Nailar, 05: Ki dkhot jong Ka Sur ki Paidbah Ka Bri U Hynniewtrep ha ka sngi Thohdieng ki la tur kyndit sha Main Secretariat ban dawa ïa ka Sorkar Meghalaya Democratic Alliance (MDA) ba ka dei ban pynbna paidbah ïa ka kaiphod tohkit kaba la aiti da u nongbishar ba la shongthait u Justice T. Vaipei sha ka Sorkar halor ka jingshah siat ïap jong u General Secretary barim ka seng kieng atiar Hynñiewtrep National Liberation Council (HNLC) u Bah Cherishterfield Thangkhiew ha iingsah jong u ha Mawlai Kynton Massar, Shillong hadien ba u la wan ban pyndem hakhmat ki bor jong ka aiñ.
U Bah Cherish u la duhei ïa la ka jong ka jingim ha ka jingleit khynra jong ki Puit ïa ka iingsah jong u ha ka step synñia jong ka 13 tarik, Nailar, 2021.
Hadien ka jingbitar jong ki paidbah nongshong shnong jong ka shnong Mawlai ka Sorkar ka la thung da ka jingtohkit kaba laitluid ba la khlieh da u nongbishar ba la shongthait u Justice T. Vaiphei uba ladep aiti ïa ka kaiphod tohkit sha ka Sorkar Jylla naduh ka 19 tarik, Jymmang, 2022.
Ki dkhot jong ka Ka Sur ki Paidbah Ka Bri U Hynniewtrep kiba la shah pakhang lynti ha ki Pulit ynda la poi ha khyrdop ban rung shapoh ka Main Secretariat ki la shong kyllaiñ myngngor syndon hapdeng surokbah da kaba rah ruh ïa ki plakad kiba la dawa ban sei madan ïa ka kaiphod tohkit bad ban pynshitom katkum ki kyndon jong ka aiñ ïa ki Pulit kiba donkti ban siat ïap ïa u Bah Cherishtarfield Thangkhiew.
Ki dkhot kane ka kynhun ki la pyrta shla ba u Bah Cherish u dei ban ïoh ïa ka hok.
Kham katto katne por ïa ki dkhot jong kane ka kynhun la khot ïakren da u Symbud Myntri Rangbah ka Jylla u Bah Prestone Tynsong.
Katba ki dkhot jong kane ka kynhun ki dang ap pali ban ïoh rung ha ka kamra jong u Bah Prestone Tynsong ki la sei da ki plakad ban dawa ïa ka hok jong u Bah Cherish bad kane kan long ruh ka sien banyngkong eh ba kano kano ka kynhun kan ïoh lad ban rah plakad hapoh ka Ophis jong ka Main Secretariat.
U nongïalam jong kane kynhun, u Bah Donboklang Kharlyngdoh ha ka jingïakren bad ki lad pathai khubor u la ïathuh ba u Symbud Myntri Rangbah u la pyntip ba ïa mynta hi ka Sorkar kan ym pat lah satia ban pynbna paidbah namarba ïa ka kaiphod tohkit ba ladep aiti da u Justice T. Vaiphei yn sa rah shwa hapoh ka Iingdorbar Thawaiñ jong ka Jylla ha ka sngi sdnag jong ka Dorbar Synrai ka ban sa long ha ka 9 tarik, Nailur, 2022.
Kane ka kynhun ka la kyntu ïa ki MLA khamtam ïa kiba la mihkhmat na ki Constituency ka rilum Khasi bad Jaiñtia ban ïakren kham bniah halor ka kaiphod khnang ba ïa ki nongïaleh kam sniew yn lah ban pynshitom katkum ka aiñ.
Ka Sur Ki Nong Mawlai (SKNM) kaba kynthup ïa ka KSU, FKJGP bad HNYF Mawlai Circle kum ka dak ban kynmaw burom ïa ka lyngkhuh sngi ïap kaba shi snem jong u Bah Cheristerfied Thangkhiew ha ka 13tarik Nailar, 2022 ka la rai ban teh da ki lama ïong ka ban sdang naduh ka por 9:00baje mynstep.
Ha ka por 12:00 baje mynsngi kan don ka jingïakynduh lang ha Kynton Massar lad um Thum Thum bad yn sdang ïa ka jingïaid kjat ban leit buh syntiew ha u lum jingtep jong u Bah Cheristerfield Thangkhiew ha Lawmali. Na Lawmali, yn don ka jingïalum lang bad ka jingïalang ba lyngkot ha Mawlai Nonglum, Petrol Pump bad yn sa pynbud pat sa ka jingthang mombati haka por janmiet.
Ka kynhun, ka khot ka wer ïa ki paidbah ba kin ïamih ryntih lang ha katei ka sngi ban pyni sha ka Sorkar ba nangne shakhmat kam dei satia ban shu dkhat jubor ïa ka jingim jongno re jongno watla un dei makna u riew uba la bakla ha ka rukom ïaid rukom ïeng ruh hynrei ka Sorkar dei ban ïaid katkum ki lynti jong ka aiñ da kaba kin kem bad ban tohkit ban lap ïa ki jingshisha baroh, ong u kyrwoh ba la phah da ka Sur Ki Nong Mawlai.
“Ka kynhun ka wer paidbah ban pyni ruh sha ka Sorkar ba kum u paid ka Bri u Hynñiewtrep ngi donhok ban tip bad ban dawa na ka Sorkar ba ka dei ban sei paidbah noh mardor ïa ka kaiphod tohkit ba shimet jong u Justice T.Vaiphei kaba u la aiti sha ka sorkar naduh ka 19 tarik, Jymmang, 2022 hynrei ka Sorkar ka ïai sngap manman bad kane kala pynsah umdum bad pynsuba sniew ïa ngi ki Sengbhalang bad kumjuh ruh ïa u paidbah solansar halor ka jingleh kuman jong ka Sorkar,” ong u kyrwoh.
Ka kynhun ka la kyrpad ïaki trai dukan kiba hap ha ka lynti ïaid leit buh syntiew kin sngewbha ban khang ïa ki dukan jong ki ha ka por ba dang leit buh syntiew khnang ba kan long ka jingpynrem ïa ka jingshah shim jubor ka jingim jong ki dkhot ka jaidbynriew bad ba kan ym jia shuh ha kano kano ka longïing jong ki para doh parasnam, pynkut u kyrwoh na Ka Sur Ki Nong Mawlai.