Sa 6 sngi hap shong u Bernard ha byndi ki pulit ban shah tohkit

Shillong, Nailar 05 : Ka ïing Bishar Judicial Magistrate First Class (JMFC) ka la rai ban ailad ïa ki pulit ban set byndi ïa u Bernard Marak sa hynriew sngi khnang ba kin ïoh ban tohkit bniah shuh shuh ïa u halor ki kam beaiñ ha ïing basa jongu ka Rimpu Bagan.
Hadien ka jingkhynra jong ki pulit ïa katei ka ïing basa jongu ha Tura, u Bernard uba la tip da ka kyrteng sin kum u Rimpu, u la jah rngai da kaba u ai daw ba u sheptieng ïoh u shah siat iap ha ki pulit hynrei ki pulit ki la ïoh kem ïa u na Uttar Pradesh bad hadien ba la wanrah ïa u sha Tura, ka ïing bishar kala rai ban set ïa u ha byndi ki pulit 8 sngi lynter bad mynta pat ka la ailad biang sa 6 sngi lynter.
Yn sa ïalam tian bishar biang ïa u hakhmat ka ïing bishar hdien hynriew sngi, ïathuh u SP ka West Garo Hills u Vinekanand SIngh Rathore.
Ki pulit ki dang bteng beit ban tohkit ïa u Bernard hadien ba ki la ïoh kurup ïa ki tiar siat, tiar pynbthei, ïoh kem 73 ngut na katei ka ïing basa jongu bad ïoh pyllait im ruh ïa ki hynriew ngut ki khynnah rit, san ki khynnah shynrang bad kawei ka khynnah kynthei na kawei ka kamra ba la set ïa ki ha katei ka ïing basah.
Na ka liang ka BJP namar ba u dei u Vice President jongka ka la dawa ban thung da ka jingtohkit ba laitluid halor ka jingkhynra ïa ka ïing basa jongu da kaba ki pulit ki la kynnoh ba u pyndonkam ïa ka ban leh ïaki kam beaiñ bad pynlong ïa ka kum ka brothel, hynrei na ka liang u Myntri Rangbah u la ong ka jingtohkit ka dang ïaid beit shakhmat halor kane ka jingjia bad kumta ym donkam ban thung ïa kata ka jingtohkit ba laitluid.
“ Namar ba ka jingtohkit ka dang ïaid bad ki jingshisha ruh ki la nang paw nang paw pyrthei kumta ngam i donkam ban don ka jingtohkit ba laitluid namar ki pulit ki leh ïa kane ka kam hadien ba ki la ïoh jingtip kaba bniah bad thikna bad ha ka jingkhynra ki la ïalam ruh wat ïa ki nongsakhi kiba na shabar ban sakhi ba kan ym don kano kano ka jingleh tam na ka liang ki pulit” ong u Myntri Rangbah.
Lah ban pynkynmaw ba ki pulit ki la khynra ïa ka Rimpu Bagan ha ka miet 22 tarik u Naitung 2022 bad lap ba ka dei ka ktem jong ki kam awria. La ïoh ban kem ïa 73 ngut ki briew bad pyllait im ïa san ngut ki khynnah rit. Hadien ba la ïalam eksamin sha ki doktor ki la lap ba katei ka khynnah rit ka la shah leh beijot ha katei ka jaka bad halor kane ki pulit ki la rejister case pyrshah ïa u Bernard kat kum ka POCSO Act.