Shillong, Nailar 05 : U Symbud Myntri Rangbah (SMR) jongka jylla uba dei peit ïa ka tnad pynmih bording (Power) u bah Prestone Tynsong u la ong mynta ka sngi Thohdieng ba ka sorkar ka la dep pyndam lah slem ïa ka projek pynmih bording ba 210 Megawatts ha Umngot Hydro Electrict Project hadien ba la mih ki jingpyrshah ba jur na ki paidbah jongka ri Khasi bad Jaintia.
“ ïa kane ka projek la dep pyndam syndon ym dei ba shu buhteng. Haba ngi ong la pyndam mut lah pyndam bad ym don shuh kata ka jingkhot ïa ka Expression of Interest (EoI) halor kane ka projek” ong u bah Prestone.
U la kren shai ïa kane hadien ba ki nongïalam ka JAC ki la wan ïa kynduh ïa u bad ki la dawa ba ka sorkar ka dei ban pynmih syndon da ka rai. U la ong “ Ki la wan ïa kynduh ïa nga bad nga la kren shai ba la pyndam bad pynwai ïa katei ka projek ïa mynta hi”.
Hynrei ha kajuh ka por ïa kaba lashai la shisngi te ym lah ban ong namar ïoh ha ka por hadien 50 snem ki briew na katei hi ka thaiñ ki ban wan dawa ba ki donkam ïa kane ka projek. “ Hooid mynta ngi la pyndam bad pynwai noh hynrei ngim lah ban tip ïa kaba lashai ne ha ka pateng ban dang wan.
Na ka liang ka Joint Action Committee(JAC) kaba ïeng pyrshah ïa ka Umngot Hydro Electric Project kaba dei ka projek ba ka sorkar ka thmu ban den ïa ka wah Umngot na bynta ban pynmih bording ha ka sngi Thohdïeng ka la dawa na ka sorkar jylla ba kan pynmih ka hukum ba ka jingthmu ban den ïa ka wah Umngot la pyndam syndon.
Haba kren bad ki lad pathai khubor u Vice Chairman jong ka JAC u Bah Pynskhem Mukhim u la ong ba ha ka 24 tarik Jylliew u Joint Secretary to the Government of Meghalaya uba peit ïa ka tnad bording u DD Shira u la phah ïa ka shithi ba ka sorkar ka la pynsahngeh ïa ka jingthmu jong ka hynrei kam kdew pat ba la pyndam syndon ïa kane ka jinghmu ka sorkar.
“Ka shithi ba ngi la ïoh pdiang na u Joint Secretary ba peit ïa ka tnad bording ka la kdew ba ka sorkar la pyndam ïa ka jingpyntrei ïa ka Umngot Hydro Electrical Project bad ki kompeni shimet ym ba la pyndam ïa ka projek” ong u Bah Pynskhem.
U Bah pynskhem u la ong ruh ba na ka liang ka JAC ka ai ka jingïaroh ïa ka sorkar ïa kane ka sienjam ba ka la shim hynrei u la ong ba na ka liang ka JAC ka dawa ba ka sorkar ka dei ban pynmih ïa ka hukum ba la pyndam syndon ïa ka jingthmu ban den ïa kwah Umngot ym tang mynta hynrei hadien habud ruh la da dei ban ki kompeni shimet ne ki kompeni ba pynïaid da ka sorkar.
Shuh shuh u la ong ba kat kum ka shgiti ba la ïoh pdiang ka kdew shai ba ka ka sorkar ka pyndam tang ïa ka hukum ban pyntrei ïa kane ka projek da ki kompeni shimet ym ïa ka jingthmu ban den ïa kane ka wah.
Haba bynrap lang ïa kane u Chairman ka Darang Tourism Society u Bah Reaching Kongwang u la ong ba na ka liang ka JAC kaba kynthup lang naduhg ki nongrep, ki trai jaka ki kynhun pynïaid ïa ki jaka jngohkai pyrthei kiba don ha ki phud bad ki khap ka wah Umngot ba da leilei kin nym ai lad ïa ka jingthmu ka sorkar ban den ïa kane ka wah.
U la ong ruh ba kum ka JAC ki dawa na ka sorkar ka dei ban pynmih ïa ka hukum kaba thymmai kaba kdew shai ba ka la pyndam syndon ïa ka jingthmu ban den ïa kane ka wah lada dei bad ki kompeni shimet ne ki kompeni sorkar.
