Shillong, Nailar, 05: Ka Ophis jong u Block Development Officer, Mylliem C&RD Block, ha ka sngi Thohdieng ka la pynlong ïa ka Self Help Gruop Mela ha ka shnong Umlyngka, Upper Shillong ha kaba u MLA u Hamletson Dohling uba long ruh u Myntri ka Sorkar Jylla u la long u Kongsan katba u MLA jong ka Nongkrem Constituency u Bah Lambor Malngiang u la long kum u Symbud Kongsan.
Haba kren kum u Kongsan u Bah Hamletson Dohling u la ïathuh ba ka National Rural Livelihoods Mission (NRLM) ka dei ka flagship programme jong ka Sorkar Pdeng kaba la buh hakhmat ïa ka thong ban ïarap ïa ki longiing kiba don ha u laiñ ka jingduk lynga ki lad jingïarap khnang ban sei ïa ki na ka jingduk jingkyrduh bad ban kyntiew ïa ka khih ka kamai jong ki kynthei.
U la ong ba ka thong jong kane ka Mela ka long ban plie lad ïa ki Self Help Group ban pynaw pyrthei ïa ka sap ka phong kiba ki don lyngba ki jingtrei ba ni na ki kti bad ban die pynïaid iew pat ïa ki. U la ong ruh ba kane kan long ka kabu kaba khraw tam ïa ki Self Help Group ban ïasam jingtip ha kum kane ka por khnang ban kyntiew iwei ïa iwei pat.
Une u Myntri ka Sorkar Jylla uba peit ruh ïa ka tnat Rural Development u la pynpaw ka jingsngewnguh ïa ka MRSLS bad ïa ka NRLM kiba la trei shitom ban pynshai paidbah sha ki shnong bapher bapher shaphang ki jingmyntoi haba don ki Self Help Group.
U la ong ba ha u snem 2018 ki don tang kumba malu mala 6000 hajar tylli ki Self Help Group ha ka Jylla hynrei mynta ki don palat 45,000 tylli ki Self Help Group ha ka jylla baroh kawei kiba ïatreilang ban kyntiew ïa ka ïoh ka kot jong ki paidbah hapdeng ki kynthei.
Haba ïaroh ïa kine ki kynhun ïatreilang jong ki kynthei ban thaw ïa ki Self Help Group, u Bah Dohling u la kyntu ïa ki ban ïasam ïa u kyrwoh jingtip khang ba ki shnong kiba don hapoh ka Mylliem Block kin nang kiew shaphrang.
U la banjur ruh ba ki dei ban buh hakhmat ïa ka thong da kaba ïakop paramaki khnang ba kin nang lah shuh shuh ban pynjanai ïa ka kam kaba ki trei.
Ha kane ka sngi, u Kongsan bad u Symbud Kongsan ki la aiti ïa ki Computer sha ki 9 tylli ki VEC, ïa ki Cheque lyngba ka FOCUS sha ki 106 tylli ki Producer Groups bad ïa ki Sanction Letters sha ki 100 tylli ki Self Help Group.
Kiwei kiwei kiba la sakhi lang ha kane ka sngi ki long u Project Director ka DRA u Bah D. Hynniewta, u BDO ka Mylliem Block u Bah P. T Passah bad kiwei kiwei.
