Tur ki sengbhalang ban dawa weng kam ïa u Manager ba kynnoh beh kam khlem daw ïa ki khynnah khasi

Nongpoh, Nailar 04: Ki kynhun sengbhalang bapher bapher naka them Ri-Bhoi naduh ka Confederation of Ri-Bhoi People (CoRP), United Hynñiewtrep Movement (UHM) bad ka Meghalaya Peoples Social Organisation (MPSO) mynta ka sngi kila tur sha khyrdop khrong khajna ka NHAI kaba don haka shnong Pahammawleiñ ha Ri-Bhoi ban khang khyrdep syndon shipor ïaka jinglum khajna naki kali paidbah ba ïaid lyngba katei ka khyrdop, namar ka jingbym suidñiew ki bor ka NHAI ban weng kam noh ïa u Manager katei ka Toll Gate u ba la shah kynnoh ba u leh meng bad kren khlem akor ïaki nongtrei khasi bad wengkam ruh khlem daw kaba la pynbitar ïa kitei ki kynhun sengbhalang.
Lyngba katei ka jingtur jong ki kynhun sengbhalang haka jingkyrshan ruh ki nongïalam shnong ka Pahammawleiñ ba kynthup ïa u Bah George Tangsang Secretary Shnong kala mih ruh ka jingkulmar puk ha katei ka jaka bad ka huri hura shipor namar ka jingpynsangeh noh ïaka jingkhrong khajna naki kali paidbah namar ka jingbitar halor ka jingleh u manager katei ka Toll Gate bala tip kyrteng kum u Gagar Rahman kaba dei ruh ka sien kaba ar ba ki sengbhalang kila tur sha katei ka jaka halor katei ka mat.
Ki nongïalam sengbhalang ba kynthup ïa u Bah Rainbow Rony Jyrwa Chairman ka UHM, u Bah Markus Makri, Secretary ka CORP, bad kiwei kila pynpaw ba ka daw ba ki la hap ban pynibor kumne ban khang shipor ïa katei ka khyrdop ka long halor ka nongrim ba ki bor ka NHAI kim pat wengkam ïa u tei u manager u ba la kynnoh donkti ban leh heh leh meng, kren ki ktien khlem akor khamtam ïaki nongtrei kynthei, bad ban wengkam khlem daw ruh ïa ki nongtrei katei ka khyrdop kiba dei ki khasi.
La kynnoh ruh ba utei u manager um ju burom wat ïaki bor pynïaid shnong jong ka Pahammawleiñ kaba la pynbitar wat ïaki nongïalam shnong ba um ju kwah ban ai ka jingïatreilang bad ka shnong.
Hadien katei ka huri hura kaba la mih ha katei ka jaka khrong khajna ka NHAI, naka liang ki bor pulit ryngkat bad ki majostor kila hiar mar mar sha katei ka jaka ban tem ï aka jingkhluid bad kano kano ka huri hura kaba lah ban mih ha katei ka jaka bad ban ïakren bad kitei ki nongïalam seng ban nym pynmih kano kano ka jingkulmar hynrei ban poi sha ka miej jong ka jingïakren.
Dei hadien ka jingïakren sngewthuh jingmut ban phah wan mih ïa utei u Manager ban ïakren bad ki nongïalam seng, naka liang jong ki kila kular ban pynjai jai noh bad ban ailad biang ïa katei ka khyrdop ba kan treikam biang, bad halor katei ka bynta naka liang ki kynhun sengbhalang kila dawa ba dei ban wengkam beit mardor ïa utei u manager na katei ka jaka khrong khajna khnang ba kino kino ki huri hura kin nym mih shuh nangne shakhmat.