Tang hapoh 1 sngi pyndep ka Assam ban pynïeng ïa ki post elektrik ha Sabuda bad Jatalong ha ka thaiñ Block II

Nongpoh, Nailar 04: Wat hapdeng ka jingpyrshah jur jong ki paidbah ka shnong Jatalong bad Sabuda haka thaiñ Block II ha Ri-Bhoi, ka sorkar Assam kala lah ban pyndep noh ïaka jingpynieng ïaki post elektrik tang hapoh 1 sngi, khlem don kano kano ka jingïakren bad ka jingpynbeit ha kaba ka sorkar Assam kala shu thung ban ioh klun jubor ïa kitei ki jaka.
U Bah Blik Sohtun u ba dei ruh u President ka Synjuk ki Rangbah Shnong Border Area jong ka Raid Nongtung u la ïathuh ba ïa kitei ki post elektrik la lah ban pynieng tang hapoh shi sngi ba ka sorkar Assam ka wanrah da ki mashin kiba heh ban pyndep ïa katei ka kam, hynrei kaba sngew lyngngoh ba ka sorkar Meghalaya ka ioh thiah lyngngai wat hapdeng ka jingpyrshah ki paidbah.
U la ong ruh ba kum ki shnong bad ki paidbah kim lah ban leh eiei halor katei ka bynta watla ki pyrshah jur namar kam don ka jingkyrshan naka sorkar Meghalaya bad kam tip eiei ba ka sorkar Assam ka wan thung ïa kitei ki post elektrik, namar lada ki briew ba don haka bor kim shimkhia ki paidbah ki shu long langkñia, dei namar katei ka daw b aka sorkar Assam ka ioh mon bad shlur ban tur sha ki lum Khasi ban klun jubor ïaki jaka puta wat sha kitei ki shnong kiba la tip shai ba ki hap haka Raid Nongtung jong ka jylla Meghalaya.
Shuh shuh u la ong ruh ba halor katei ka jingpyrshah ban pynpoi bording ka Assam hakitei ki 2 shnong la dep phah ruh da ka jingthoh sha u Bah Prestone Tynsong Symbud Myntri Rangbah ka jylla bad kumjuh ruh sha u Deputy Commissioner ka Ri-Bhoi District ban kyntu ïakitei ba kidei ban leh eiei bad ban ïakren bad ki heh sorkar jong ka Assam ban pynsangeh ïa katei ka jingpynpoi bording jong ka Assam sha kitei ki thaiñ, kumba la pynpaw shai ruh ba ki paidbah kim kwah bording na Assam hynrei ki kwah naka jylla Meghalaya, hynrei jar jar ka Assam ka pyni da ki kam bad mynta ki post elektrik kila ieng ha kitei ki 2 tylli ki shnong.
Namarkata halor katei ka jingleh donbor jong ka Assam bad ka jingleh mynthi jong ka sorkar Meghalaya naka liang ki paidbah kila rai ruh ban lum daka jingïalang ha kine ki sngi ban wan.