Shillong, Naitung 02 : Hadien ka jingïakhun kaba shongshit bha ha ka kylla kaba nyngkong (first leg) jong ka Shillong Premier League, ki bor pynïaid kin sdang biang mynta ka sngi Balang ïa ka kylla kaba ar (second leg) ha kaba ka Shillong Lajong FC kan aireng pyrshah ïa ka Rangdajied United FC ha ka jingïakhun kaba nyngkong ha ka por 4:00 baje janmiet ha madan Third Ground, Polo.
Kitei ki ar kynhun ha ka jingïakynduh aireng ha ka kylla kaba nyngkong, kata ha ka 18tarik Naitung, ka Rangdajied United ka la ïoh ban pynliem da 2-0 kol, kaba dei ruh ka sien kaba nyngkong naduh u 2016 ba ka Rngdajied kan ïoh ban pynliem ïa ka Lajong ha katei ka lympung.
Ha kane ka samoi, ka Lajong kaba don ha ka kyrdan kaba hynriew kam shym la lah satia ban ïalehkai bha ha ka kylla kaba nyngkong namar ka dang ïoh ban pynliem tang ïa ka Malki SC bad ïa ka Mawkhar, kiba dei ki kynhun kiba don kham sha trai. Hynrei haba phai sha ka Rangdajied, katei ka kynhun ka la ïoh ban khur lai tylli ki jingjop hynrei ka mad pat ïa ka jingïakhaid bad ka Malki bad Mawkhar bad don mynta ha ka kyrdan kaba lai.
Ha ka samoi ba la dep jong u 2019, ka Rangdajied ka la lamkhmat ïa ka Lajong shiteng lynti hynrei da ka jingïalehkai bha ha ka kylla kaba ar ka la ïoh ban tam kylla. Mynta ka kynti, ka Lajong ka buh thong ba kan jam shakhmat hynrei ban poi biang sha khlieh duh ka hap ban ïakhun tyngeh namar ka Mawlai naduh kaba sdang ka la buh lypa ïalade ha ka jaka kaba shngaiñ.
Kumba long mynta hi, ka Mawlai ka don ha khlieh duh da ki 19 point na ki 7 tylli ki jingïakhun nalor ba kam pat shah thep shi kol ruh ha ki 630 minit ki jingïakhun hapdeng madan.
