Ka jingkam u Myntri Rangbah dei ban don ryngkat ka jingpynshisha da kiba shai: HYC
Halor ka tulop ki nonghikai déficit ha ki College
Shillong, Naiwieng 20: Ka Hynñiewtrep Youths’ Council (HYC) ka pynrem jur ïa ka jingkren u Chief Minister ba ki don katto katne ki nonghikai déficit ha ki College jong ka Jylla kiba ioh tulop haduh 4.5 lakh shi bnai.Ka jingkren kaba kum kane na u Khliehduh jong ka Sorkar Jylla ka dei ban don ha ryngkat ka jingpynshisha da ki kot ki sla kiba shai, ym tang da ki kyntien kynnoh kynthoh ïa ki Nonghikai ha ryngkat ka jingmut ban nion bein ïa ki.
Katkum ka 7th UGC Pay Structure, ka tulop kaba sdang (basic pay) ka long naduh 57,700 na ka bynta u Assistant Professor, haduh 1,44,200 na ka bynta u Professor bad 1,82,2 00 na ka bynta u Senior Professor.Wat ha ka pay-matrix kaba heh tam hapoh ka Academic Level 15, ka long tang 2, 24, 100.Haba kynthup lang ïa ki jingioh baroh, ka tulop kaba ioh (gross salary) ka lah ban kiew, hynrei ka jingkren u Chief Minister ba ioh haduh 4.5 lakh ka donkam ban pynshai da ka jingpynshisha kaba shai bad kaba thikna.
Ka HYC ka dawa ïa u Chief Minister ba un pyntip bad pyni tang kawei ka kot siew tulop (pay slip) kaba thikna jong u nonghikai déficit College uba ioh 4.5 lakh shi bnai.U dei ban batai shai ïa ka kyrdan (designation), ka Academic Level bad ki bynta jong ka tulop.Lada um lah ban pynbiang ïa ka jingpynshisha, u dei ban weng ïa ka jingkren laplah ka jong u bad panmap Paidbah na ki nonghikai.
Ka HYC ka kwah ruh ban kdew ba u Chief Minister u dei pynban ban pynshai paidbah shaphang ka jinglut jong ka pisa paidbah na ka bynta ki Chairperson, Co-Chairperson bad ki Adviser jong ka Sorkar.U dei ruh ban pynpaw ïa ka jinglut baroh kaba kynthup ïa ki tulop, allowance, kali, nongtrei (staff) bad kiwei ki jingmyntoi jong ki.Balei la shu kynnoh, kynthoh bad pynpaw paidbah ïa ki jingioh ki nonghikai, katba ka tulop, ki allowance bad ki jingmyntoi jong ki political appointee lah shu darap-jot bad set na ki paidbah?
Ka HYC kam lah ban shu sngap ban iohi ba ki nonghikai jong ngi kin shah kynthoh bad kynnoh khlem nongrim.