Kane ka sorkar ka dei kaba don ki khmat, hynrei kam ïohi, ka don ki shkor kam ïoh sngew, ong ki nonghikai
Shillong, Naiwieng 20: Ki nonghikai KJDSTA hapoh ka Laban Zone bad kiwei kiwei pat ki zone ki la leit ban shim bynta ha ka jingïakhih jong ki nonghikai kaba la sdang mynta la bun sngi hakhmat jong ka ophis MOBOSE Shillong bad kane ka jingïakhih ka ba la sdang mynta la bun sngi na ka liang jong ki nonghikai ki la pynpaw ïa ka jingpyrshah halor ka jinglong kuman jong ka sorkar ïa ki jingdawa jong ki.
Haba kren sha ki lad pathai khubor na ka liang jong Sangeeta Das bad T Thangkhiew ki la pynpaw ba kane ka jingleh jong ka sorkar ka long kumba ïuhroit ïa ki nonghikai bad ki la ong ruh ba kin ïaibteng ïa kane ka jingïakhih tat haduh ba kin da ïoh ïa ki jingdawa jong ki.
Ha kane ka sngi na ka liang jong kiba bun ki la ai jingkren bad ki la kynthoh ïa ka sorkar ïa ka jingbym lah ban shim khia ïa ki jingdawa jong ki wat la ki la buh na ka por sha ka por.
Kane ka sorkar ka don ki khmat kam ïohi, ka don ki shor kam ïoh sngew bad kane ka dei ka sorkar kaba matlah ka sorkar kaba kyllut namar kine ki jingdawa ki dei kiba la dawa mynta la shi snem tam bad kane ka la sdang da ka jingïakhih kaba jai jai ha Madan Malki da kaba shong kyllaiñ Myngor bad kane ka la ïai bteng haduh mynta hynrei na ka liang ka sorkar ka la shuh sngap beit jar.
Na ka liang jong ki nonghikai ki la shim ïa ka rai ban ïaibteng ban ïakhih tad haduh ba ka sorkar ka la shim ïa ki sienjam ban ïarap lang ïa ki nonghikai.