30 tarik khot ïasyllok ka tnad pule puthi ïa ki nonghikai kiba don ha ki skul deficit
Shillong, Naiwieng 20 : Ka Directorate of School Education and Literacy kala khot pynlong ia ka jingiasyllok bad ki nonghikai kiba don ha ki skul deficit ha ka 30 tarik Naiwieng, kum ka jingpyrshang ban sngewthuh ïa ki jingeh ba ki don bad ban iapyrkhat ia ka lynti ban pynbeit ba mynjur lang halor ki jingdawa jong ki.
Katkum ka shithi bala phah ha ka 20 tarik Naiwieng, ka Director of School Education and Literacy, Ka Richa Kulkarni kala pyntip sha baroh ki District School Education Officer bad Sub-Divisional School Education Officer halor kane ka jingialang.
Katkum ka shithi ba la phah sha ka DSEOs ka Shillong, Jowai, Khliehriat, Nongpoh, Nongstoin, Mawkyrwat, Tura, Williamnagar, Baghmara, Ampati bad Resubelpara, bad ki SDSEOs ka Shillong, Jowai, Khliehriat, Nongpoh, Nongstoin, Mawkyrwat, Tura, Williamnagar, Baghmara, Ampati, Resubelpara, Sohra, Mairang, Amlarem bad Dadenggre.
Ïa kane ka jingialang la pynbeit hadien ka jingkut jong ki eksam ba dang iaid mynta, ka ban ïai bteng haduh ka 27 tarik Naiwieng, 2026, khnang ba kan nym pynthut ïa ka eksam.Ïa kane ka jingïasyllok yn pynlong ha ka por 3 baje janmiet ha MTTA Conference Hall, DERT Annex, Malki, Shillong.
Ka Kulkarni ka la kyntu ïa ki DSEO bad SDSEO ba kin phah ïa san ngut ki nonghikai deficit na ki skul deficit bapher bapher kiba hap ha ki district jong ki, ba kin wan sha ka jingialang.La pyntip ba yn ai ruh ïa ka TA bad DA ïa kine ki nonghikai, bad la bthah ïa kine ki Ophisar ba kin phah ïa ki jingtip ba bniah halor ki nong hikai ba la jied hashuwa ka 27 tarik Naiwieng.