La phi don ha skul, ha surok ne ha secretariat ngin donlang, ai mynsiem ka KSU ïa ki nonghikai deficit ha Ri-Bhoi

0

Nongpoh, Naiwieng 19: Ka KSU North Khasi Hills District hapoh ka jingïalam u Bah Ferdinald Kharkamni President lem bad ki dkhot mynta ka sngi kila leit ban ai mynsiem ïaki nonghikai Deficit na Ri-Bhoi kiba dang pynlong ka jingïakhih ha madan NSCA Pahamsyiem ban dawa naka sorkar ban pynurlong ïaki mat ba ka kynhun ki nonghikai kala buh ka jingdawa sha ka sorkar.
Haba kren ha kane ka sngi naka liang u Bah Ferdinald Kharkamni President ka KSU u la ong ka seng kan don bynta bad ki nonghikai ha kano kano ka jaka kaba ki don la ka long ha kamra klas, ha surok ne ha secretariat ban pynurlong ïaki mat dawa ba ki nonghikai deficit kila buh hakhmat ka sorkar namar ki mat dawa ki long tang khyndiat kaba dei ka hok jong ki bad ki khlem pan ïa kaei kaba ka sorkar kam lah ban ai bad lada ka sorkar ka kwah ba ka pule puthi kan bit kan biang haka jylla dei ban pynbiang shuwa ïaki nonghikai.
U la ong ruh shibynta ka long ka jingsngewsih ba ka dei ka por ba ki khynnah skul ki dang pynkhreh ïaki eksam bapher bapher, hynrei kane ka jingïakhih kam dei shuh kaba dang thymmai ha kaba naka liang ka seng khlem da pynduh mynsiem ruh ïaki samla pule kala kyrpad ba kin minot bad tista haka jingpule ban khreh ïaki kot khlem da duh mynsiem ïaka jingïakhih jong ki nonghikai, hynrei kin ïaleh katba lah khnang ba kane ka mat dawa jong ki nonghikai deficit kan urlong noh.
“Ka dei ka hok jong phi bad ka sorkar ka dei ban shimkhia noh mardor, kam dei shuh ba ki nonghikai kin hap tied jingkhang hynrei u Myntri Rangbah bad ki myntri ba dei peit bad don ka jingkitkhlieh kin shimkhia, ba kine ki mat dawa ki dei ban urlong noh kham kloi” la ong u Bah Ferdinald da kaba bynrap ruh ba naka liang ka seng kan ïai don ryngkat bad ïaleh katba lah ban pynsngew ïa kane ka mat dawa sha ka sorkar ba ki dei ban urlong noh ban nym thud ka pule puthi ki khynnah.

Leave A Reply

Your email address will not be published.