“Kane ka la pynhiar kyrdan ïa ka saiñ pyrkhat bad ïa ka kyrdan kum u nongïalam ka jylla”
Pynrem ka JCC ïa ka jingkren laplah u Bah Tynsong
Shillong, Naiwieng 19: Ka Joint Coordination Committee kaba kynthup ïa ka Federation of Khasi Jaiñtia and Garo People (FKJGP), Hynñiewtrep National Youth Front (HNYF), Ri-Bhoi Youth Federation (RBYF), Jaiñtia Students Union (JSU), Garo Students Union (GSU), A-Chik Youth Welfare Organization (AYWO), Association for Democracy and Empowerment (ADE), and the Federation for A-Chik Freedom (FAF), All A-Chik Youth Welfare Society (AAYWS) & A-Chik Holistic Awakening Movement (AHAM) ka pynrem jur ïa ka jingkren laplah jong u Bah Prestone Tynsong uba dei ruh u Deputy Chief Minister jong ka sorkar jylla pyrshah ïa ki nonghikai kiba pynlong iaka jingiakhih hapoh jong ka shatri Khasi-Jaintia Deficit School Teachers’ Association (KJDSTA) da kaba kynnoh ba kidei ki ‘kruiñ bad ki sohpyut’.
Na ka liang ka JCC ka la ong ba katei ka jingkren laplah jong u Bah Prestone Tynsong ym tang ba kala pynhiar kyrdan ïa ka saiñ pyrkhat bad ïa ka kyrdan jong u hi kat u Deputy Chief Minister jong ka sorkar jylla hynrei kala ktah iaka burom bad ka ijot jong baroh ki Nonghikai kiba ai ïa ka jingshakri bad kiba don ha ki jylli bapher bapher naduh ki Skul, ki College & University ruh kumjuh, ym tang katta katei ka jingkren jong u Bah Prestone Tynsong kala pynmong ym tang ïa ki Nonghikai hynrei wat ïa ki kmie ki kpa jong ki khynnah skul bad samla pule ha ka jylla kaba la ktah matïong hi ruh ïa ki paid nong shnong shnong jong ka jylla kiba la sakhi ïa u synñiang u bynhei jong ki Nonghikai kaba ki la noh sha ka imlang ka sahlang bad sha ka Jaitbynriew jong ka Jylla hi baroh kawei.
Na ka liang jong Ka Join Coordination Committee (FKJGP, HNYF, RBYF, JSU, GSU, AYWO, ADE, FAF, AAYWS & AHAM) ka dawa mardor na u Bah Prestone Tynsong, Deputy Chief Minister jong ka sorkar jylla ba u dei ban panmab mardor na ki Nonghikai bad hakhmat jong ki Paidbah jong ka jylla hi baroh kawei ïa katei ka jingkren laplah da ki kyntien phlan duman pyrshah ïa ki Nonghikai kiba la long kiwei na ki païa khnong ban kyntiew ïa ka jing nang jingstad, ïa kaba kum ki paidbah wat ka kylleng ki ri jong ka pyrthei ruh kila ju ñiew burom ba ka kam nonghikai kadei ka kam kaba donburom tam hakhmat jong ka pyrthei bad lada u Bah Prestone Tynsong um nud ban panmap ka pawshai ba u dei hi ma u uta u ‘kruiñ bad u sohpyut’ hakhmat jong ka jylla hi baroh kawei, ong ka kyrwoh ba la phah da u Bah Kitboklang Nongphlang Vice President FKJGP Central Body.