Ngim da khmih lynti na u briew uba la kop sarong ba u kloi ban ïatreilang bad ki ksuid: KJDSTA

0

Shillong, Naiwieng 19: Ki nonghikai kiba don hapoh ka shatri Khasi Jaintia Defecit School Teacher Association (KJDSTA), kum shi bynta jong ka jingbteng ka jingiakhih ba khlem pud sngi mynta ka sngi Palei, ki lai tylli ki zone kila pynlong ïa ka jingshong kyllain mungor ha khmat ka ophis trei kam jong ka MBOSE Office, Lachaumiere.
Ki zone kiba la pynlong ïa kane ka jingïakhih kadei na Mawlai, Mawprem bad Nongthymmai Zone, ïa kane ka jingïakhih na ka liang jong ki bor pyniaid District kila ai por naduh ka 10 baje mynstep haduh ka por 2 baje noh phai sngi.
Ki mat jingdawa ki kynthup ban pyntreikam ïa ka CPF bad NPS, ban pyllait ïa ka 51% bad 53% Dearness Allowance bad ka Arrears 43% Dearness Allowance, ka jingpyntreikam ïa ka CPF Contribution kaba 10 % na ka tulop ki nonghikai bad ban pyndap ïa ki kam ba sah thylli.
Nangta ban pynduh ïa ka Meghalaya Non-government School and College Employees Centralized Provident Fund Scheme 2026 bad pyntreikam da kaba la mynjur ha u snem 2023, ban ai biang ïa ka Board of Trustees, bym dei ban pyntreikam ïa ka Structured Pay Framework ha ka Deficit System, ka tulop kaba biang por, ka jingpyntreikam ïa ka MACPS, ka jingkiar na kaba pynthut ïa ka Deficit System.
Ha kane ka sngi na ka liang jong ki dkhot ka Meghalaya College Teacher Association (MCTA) kila wan ban ai jingkyrshan ïa ki dkhot jong ka KJDSTA.
Na ka liang u Bah Boswell Pala uba dei u President haba kren sha ki lad pathai khubor u la ong, Ngim da khmih lynti than na u briew uba la kop sarong ha u snem 2018 ba u kloi ban ïa trei lang bad ki ksuid bad na kum uta u briew ngim da khmih lynti than.
“Na kum uta u briew, ngim shym la khmih lynti than kaei kaei.Hynrei ngam poi pyrkhat pat de ba un ai ka jingpynshai kum mynnin halor kato ka jingkhot keuin ïa ngi bad halor ka jingkhot sohpyut ïa ngi bad ka jingkyntait ban pdiang wat tang shi tyngka ka jingshah ot tulop,” u la bynrap.
Shuh shuh u Bah Pala u la ong, “Kane ka jingong ba ngim dei ban ïakhih ha ka por ba don exam kadei tang ka rukom ban shim kabu ïa ngi da kaba pyndonkam da ka dur jong ki khynnah ba lui lui, da kaba pyndonkam ba ngi hap ban pyrkhat ïa ki khynnah”.
“Lada phi ieit shisha ïa ki khynnah lah dei ban peit ïa kiba bun kiei kiei kiba ka sorkar ka leh, ka tnad pule puthi ka leh kaba pyntroin ïa khynnah, kane ka jingbym thungkam ïa ki nonghikai ha kine ki post ha ki skul bapher bapher lane ka jingbym ai jingbit ban ai advertise bad kumta ter ter” ong u Bah Pala.
Shuh shuh u la ong kane ka jingpynlong ïa ka exam matric ha une u bnai Nohprah, haba ki khynnah ki pat long ba la kloi bad kim pat dep ban pynkhreh ïa ka jingpule jong ki, te kane ka rukom ong ban ap shwa ynda lah dep ka exam nangta sa ïakhih, tip kan dei tang ka nia aiu.

Leave A Reply

Your email address will not be published.