Kurup ka tnat ANTF ïa kiba bun ki drok na kiba bun ki jaka jong ka Nongbah Shillong
Shillong, Naiwieng 19: Ka ophis treikam jong u Superintendent ki pulit ka Anti Narcotics Task Force, Meghalaya, Shillong, u Vikash Kumar, IPS u la ïoh jingtip ba thikna ha kaba ïadei bad ka kam khaïi drok, ha kaba ka kynhun jong ka Anti-Narcotics Task Force (ANTF), Meghalaya, kala pynlong ïa ka jingkhynra ha Lum Survey ha kane ka nongbah Shillong ha ka 17 tarik u Naiwieng, 2026.
Kane ka kynhun ka la dep pynlong ïa ka jingkhynra ha ki lai tylli ki jaka ba hap la ka jong kaba pynlong ïa ki ban lap bad kurup noh ïa ki khyndai tylli ki song sabon jong u drok heroine ba khia 110.34 gram na kawei na ka iingsah kaba don ha nongbah Shillong. Kaba ar ka dei na ka ïingsah jong kawei ka briew, ha kaba la ïoh kurup 63 tylli ki bitor barit ba don 10.10 gram u drok heroin. Katba kaba lai dei na ka ïingsah jong uwei pat u briew, ha kaba la dep kurup 65 tylli ki bitor barit ba khia kumba 10.17 gram u drok heroin.
Ha katei ka jingkhynra, baroh ki drok heroine ba la ïoh kurup ka long 130.61 gram, ba kynthup khyndai tylli ki song sabon bad 128 tylli ki bilor barit. La dep ujor ruh da ka ejahar ïa kine ki lai tylli ki jingjia pyrshah ïa kine ki lai ngut ha Cantonment Beat House. Katba ka jingtohkit ka dang ïaid shakhmat khnang ban lap ksai ïa kiba donkti, katno ka jingdon kane ka kam khaïi drok bad kiwei kiwei ki jingdonkti. Kane ka dei ka jingkhynra kaba ar ha Lum Survey kaba la jia shi miet shi miet.
Kham mynshuwa ha ka 7 tarik u Naiwieng, 2026, haba katei ka kynhun kala ïoh jingtip ba pura ha kaba ïadei bad uba shah suba ba halor ka kam khaïi drok, kila pynlong da ka jingkhynra hapoh ka kamra ha Lumsurvey.
Ha katei ka jingkhynra, la lap bad kurup noh ar tylli ki song sabon ba don 27.00 gram u drok heroin. Katba ha ki ar tylli ki jingkhynra kiba la pynlong ha ka 7 bad 17 tarik u Naiwieng, 2026, kumba 157.61 gram u drok heroin, uba shongdor T. 75 lak, la khaïi beaiñ ha ka ïew, la kurup noh bad la shimkhia ïa kane pyrshah ïa kine ki san ngut kiba donkti.
Kine ki jingtreikam kiba jop ki pyni ïa ka jingtrei shitom kaba bteng, kaba ïatreilang bad kaba shong nongrim ha ki jingtip ba bniah jong ka ANTF ban pynduh pyndam ïa ki kynhun die drok hapoh shnong bad ban khanglad ïa ka jingïoh ïa ki jingdih ba pynbuaid hapoh Shillong. Ka jingtohkit kaba kham bniah ka dang ïaid shakhmat.