Palat 576 MT u dewiong ha jylla, donkam ban sumar ïa ki jaka hadien ba la dep tih

By Mawphor Editor On Aug 2, 2022

Kawei na ki jaka tih dewiong ha Meghalaya

Shillong, Nailar 1 : U Myntri la tnad Coal, Mines ka sorkar pdeng u Pralhad Joshi haba jubab da ka jingthoh hapoh ka ïing dorbar thawaiñ Parliament Rajya Sabha u la pynpaw kat kum ka jingkheiñ ba la lum da ka Coal Inventory of India kaba la pynmih da ka Geology Survey of India (GSI) la lap ba kat haduh 1.4.2021 u dewiong u don haduh 576.48 Matric Ton ha Meghalaya.
Ka Coal Control Organisaton (CCO) ka la ïoh jingtip ba kam shym la don ka jingtih ne pynmih dewiong ha Meghalaya mynta la saw snem lynter.
Ka National Green Tribunal (NGT) ha ka hukum ba ka la pynmih ha ka 9.6.2014 hadien ba ka la lap ba ka lyer, ka um bad ka mariang ki la jakhliah palat na ka jingtih pathar ïa u dewiong da kaba shu tih liewkhnai ha baroh kawei ka jylla Meghalaya, kumta ban ïada ïa ka mariang ka la khang ban tih ïa u dewiong. Kumjuh ruh naka liang ka ïing bishar Suprme Court ruh ha ka hukum ba 3.7.2019 ka la buh ïa ki kyndon kumne harum.
Dei ban bud ryntih ïa ki kyndon ka aiñ The Mines Act 1952 shwa ban tih dewiong. Nalor kane ka Coal Mines Regulation 2017 ruh ka don bun ki kyndon ba dei ban bud pyrkhing ha kaba tih ïa u dewiong.
Ka sorkar jylla ka dei ban pynthikna ba hap ban pyntreikam ïa ka Mines Act 1952 bad ïa ka Regulation 2017 na ka bynta ka bha ka miat ki nongshong shnong bad ka mariang hi ha ka jylla Meghalaya.
Kat kum ka notification ba la pynmih ha ka 15.01.2016 da ka Environment (Protection) Act 1986 don kam ban ïoh jingbit shwa ban sdang tih ïa u dewiong ha kano kano ka jaka. Kumta ha kaba pyntreikam ïa ki kyndon aiñ ban tih dewiong ha ka jylla Meghalaya ka sorkar jylla ka hap ban pynthikna ba ym tang ban pyntreikam ïa ka MMDR Act 1957 hynrei ïa ka Mines Act 1952 bad kumjuh ruh ïa ka Environment (Protection ) Act 1986.
Ka sorkar jylla ka dei ban pyntreikam ïa ki mat kiba la pynkhreh da ka Committee ba la thung da ka NGT ban khang noh ïa ka jingtih dewiong kumba la bthah da ka NGT naduh u 2014. Ban peit ruh ba kam dei ban ym don kano kano ka jingktah ïa ki jingthaw ba im naduh ki briew ki mrad bad ka mariang na ka jingtih ïa u dewiong da kaba pyntreikam pyrkhing ïaki aiñ.
Hooid ka sorkar pdeng kam pat leh kano kano ka wad jingkheiñ ne jingtip ba bniah hynrei kane ka long tang kat kum ka jingtip kaba la ai da u myntri ka tnad sorkar pdeng ba dei peit ïa ka tnad Coal, Mines ha ïing dorbar Parliament u Pralhad Joshi da kaba jubab da ka jingthoh ha Rajya Sabha.