Pyndep ar ngut ki nongkiew lum ka jylla ïa ka Advanced Mountaineering Course ha Darjeeling
Shillong, Naiwieng 19: Ka Meghalaya Sport Climbing and Mountaineering Association (MeSCMA) ka sngew sarong ban pynbna ba u B. Kyrmenskhem Lyngdoh bad u Keliostar Pdai ki la pyndep ïa ka Advanced Mountaineering Course ba la pynlong da ka Himalayan Mountaineering Institute (HMI) ha Darjeeling.
U Kyrmenskhem udei u cadet jong ka 2nd Meghalaya Battalion NCC na Sankardev College katba u Keliostar udei u pulit Constable jong ka 3rd MLP Bn.
Kane ka prokram pyntbit ka la long naduh ka 21 tarik Risaw haduh ka 17 tarik u Naiwieng.
Baroh arngut ki la ïoh ïa ka jingkyrshan pisa shi bynta na ka MeSCMA bad ki la bah khlieh hi dalade ban pyndap ïa ki jinglut jingsep kiba dang sah na la ka jong ka pla, kaba pyni ïa ka jingaiti bad ka jingkut jingmut jong ki ban bteng ïa ka prokram jinghikai kaba kham shalor ha ka kam kiew lum.
Kum shi bynta jong ka prokram ai jinghikai kiew lum ba kynjang, baroh arngut ki la pyndep ban kiew sha kliar jong u lum BC Roy (uba jrong 18,000 phut), kaba pyni ïa ka jinglah shah jong ka met, ka jingtbit, ka jingtreilang bad ka jingkut jingmut.
Nalor kane ka jingjop, u Kyrmenskhem bad 12 ngut kiwei pat kiba la shah pyntbit ki la ïohpdiang ïa ka khusnam “Best Expedition Planning”, kaba ithuh ïa ka jinglong ba tbit bad ka rukom pynkhreh ba thikna jong ki ha kane ka prokram.
Ha ka 17 tarik Naiwieng ka HMI Darjeeling ka la rakhe ïa ka jingpyndep hok ïa ka Advanced Mountaineering Course, ha kaba baroh ki don 59 ngut kiba la pyndep ïa ka jingpule.
La pynkut ïa ka jingrakhe da ka jingkren kaba ai mynsiem na u Principal ka HMI, u Col. Rajneesh Joshi, uba la ai khublei ïa baroh kiba la pyndep ïa ka jingpule bad ai mynsiem ïa ki ba kin pynneh ïa ka jinglong ba jingshlur, ka jinglong ryntih, ka jinglong nongïalam bad ka jingminot ïa ka kam kaba kin dang ïai leh hadien habud.
Na ka liang jong ka MeSCMA ka ai khublei ïa baroh arngut halor ka jingjop bad ka kitbok ïa kaba bha tam ïa ka lawei jong baroh ar ngut ha ka kam kiew lum. Ka jingjop jong ki ka long kawei pat ka sienjam kaba ai mynsiem ban pynkhlaiñ ïa ka kam kiew lum ha Meghalaya.