SSA Champions Cup 2026: Pynskhem ka Mawlai ïa la ka jong ka jaka ha ka semi final da ka jingjop pyrshah ïa ka Mawpat

0

Shillong, Naiwieng 19: Ka Mawlai SC ka la kylla long ka kynhun ba nyngkong ban pynthikna ïa ka jaka ha ka semifinal jong ka lympung SSA Champions Cup 2026 hadien ka jingjop kaba da 3-2 kol pyrshah ïa ka Mawpat SC ha ka Group A, ha ka jingïakhun kaba itynnad bha hynne ka sngi Palei ha SSA Stadium.
U Reform Pale (17’) u la pynkhihjar nyngkong na ka bynta ka Mawpat hynrei ka Mawlai ka la wanphai ban lamkhmat kylla ïa ka jingïakhun lyngba ki kol na u Damanbhalang Chyne (26’, 47’) bad u Ricky Chyne (85’). U Sparkle Khongshei (89’) u la thep ïa ka kol ba ar jong ka Mawpat kaba pynlong ïa kane ka jingïakhun kaba itynnad haduh ka jingsawa ba khatduh.
Haduh mynta, ka Mawlai ka la mad ïa ka rekod jingjop ba paka, da kaba khur 9 poiñ na ki lai tylli ki jingïalehkai bad sah sa kawei ban pyndep. Katba na ka bynta ka Mawpat, kane ka dei ka jingïalehkai ba khatduh jong ki ha ka Group bad ka la pyndep da kaba kamai 7 poiñ. Mynta ka don ha ka kyrdan ba-ar, bad ka don jingkyrmen kaba skhem ban rung sha ka semi final kum ka kynhun ba wan ba-ar, ha kaba ka Mawpdang SC (4 poiñ) ka donkam ban jop bun kol pyrshah ïa ka Lamlynti FC ha ka sngi Saitjaiñ khnang ban weng ïa ka Mawpat.
Ka Mawpat, kaba dei ka lahduh jong ka Second Division, kam pat shah rem hashwa kane ka jingïalehkai bad ka la wanrah ïa ka jingïakhun kaba tyngeh sha ka Mawlai da kaba pynkhihjar hadien 17 minit ba la ïaid ka por lyngba u Reform.
Hynrei hadien 9 minit u kapten ka Mawlai u Damanbhalang, u la pynïakhaid ïa ka jingïakhun, kaba pynlong ïa kine ki arliang mamla ban jam sha ka por shongthait da mar 1-1 kol. Nangta u la bynrap ïa ka kol kaba ar ha ka minit kaba 47 mar ïa sdang ka kylla miet ban buh hakhmat ïa ka Mawlai.
Lah ban kdew ba ka rukom lehkai jong ka Mawpat ka la kham duna ha ka kylla miet wat hapdeng ka jingkyrshan kaba shitrhem naki paidbah kiba la ai mynsiem ïa ki ha man la ka por. Ka kynhun ka la shah thep biang hadien ba u Ricky u la ïohlad ban pyndei tiak ïa ka bol pashat na ka corner kick ban jam sha shiliang u laiñ, kaba la nang pynjlan ïa ka kol lamkhmat sha ka 3-1 kol.
U Sparkle, uba la mih bujli ha ka kylla miet, u la pynduna ïa ka kol lamkhmat sha ka 3-2 kol hadien ba u la pynkhihjar ha ka minit ba khatduh shuwa ban kut. Hynrei ka Mawlai ka la pyneh triang ban khur ïa ka namjop kaba lai sien lynter bad pyndep ha khlieh duh jong ka Group A hashwa ka wat ïakhun knockout.
Ka jingïakhun ha kane ka sngi Thohdieng kan dei jong ka Group B, ha kaba ka Shillong Lajong FC kaba lamkhmat ïa ka Group kan aireng pyrshah ïa ka Mawkhar SC kaba wan ba-ar ha ka por 2:30 baje nohphai sngi.
Baroh ar ki la kamai mar 6 poiñ, hynrei ka Lajong ka wan hakhmat namar ka don ïa ka jingïapher kol kaba kham heh da +10 haba ïanujor bad ka Mawkhar.

Leave A Reply

Your email address will not be published.