Shillong, Nailar 01 : U Chief Executive Member ka Khasi Hills Autonomous District Council (KHADC), Bah Titos W Chyne u la dawa ba dei ban thung da ka Judicial Inquiry ban tohkit halor ka jingkem pang haduh 21 ngut ki khynnah skul ha Laitlyngkot hadien ba ki dih ïa ki dawai ba ai da ka tnad ka Koit ka Khiah.
“Kadei ka jingjia kaba shyrkhei bha kaba lah ba ktah ïa ka mynsiem briew ruh. Nga kyntu ïa ka sorkar ba kadei ban buh da ka Judicial Inquiry ban tip ïa ka daw tynrai kumno ki shitom,” u la ong da kaba pynpaw ruh ba u suba ba katei ka jingkempang jong ki ka lah ban dei na ki dawai.
U Bah Titos u ong ruh ba donkam ban tip bniah halor katei ka jingjia khnang ba kan ym buh jingsyier pat ïa ki paidbah ban ai ïa kiwei pat ki jingsumar.
Lah ban kdew hangne ba haduh 21 ngut ki Khynnah jong ka Skul Kyntiew Shaphrang Higher Secondary School ha Laitlyngkot kiba shong Class VI haduh Class VIII hadien ba ki la dih ïa ka dawai Iron and Folic Acid, kaba dei ka dawai snam ha ka 29 tarik u Naitung 2022 bad ïa kine ki Khynnah skul la hap ban rah kyrkieh sha Hospital. Kine ki khynnah ki la ïoh pang prie, pynhiar bad suh kpoh.
