Shlur ki samla na Ri Bhoi ban mih shakhmat ban shimbynta ha ka Viksit Bharat Young Leader Dialogue
Nongpoh, Naiwieng 18: Ka ophis jong u District Sports Officer, Ri-Bhoi District, mynta ka sngi ka la pynlong ïa ka District Level PPT Presentation, kaba dei shi bynta jong ka Viksit Bharat Challenge Track hapoh ka prokram Viksit Bharat Young Leader Dialogue.Ïa kane ka jingïakop la pynlong ha DRDA Conference Hall, Nongpoh.
Ha kane ka rynsan, la wan ban ïashim bynta da ki samla pule na ki dong bad ki thaiñ bapher bapher jong ka Ri-Bhoi District. Kine ki samla ki dei kiba la shah jied lyngba ka jingïakop kyntip tkien bad thoh essay, kaba la pynlong lyngba ka online platform, bad ki la ïoh ïa ka lad ban jam sha ka kyrdan District Level ban ïashim bynta ha ka jingïakop PPT Presentation halor ka phang “Act East Connectivity and Cultural Leadership”.
Lyngba kane ka jingïakop, ki samla ki la ïoh ïa ka lad ban pyni ïa ka sap, ka jingstad bad ka jingnang jingtip jong ki ha ka ban shna bad pynkhreh ïa ki Power Point Presentation da kaba pyndonkam ïa ki kor computer. Ki la pyni ruh ïa ka jingtbit jong ki ha ka ban pynshai bad ban batai ïa ki jingmut bad ki jingpyrkhat jong ki halor ka phang ba la ai, ha khmat ki nongbishar bad ki sahep sorkar.
Ïa kane ka prokram la sakhi lang da u SDO jong ka Patharkhmah Civil Sub-Division, u Vaibhav Anand Sharma, kum u Kongsan, u District Sports Officer, Ri-Bhoi, u Bah Bobby L. Nongbet; u Deputy Director, My Bharat Ri-Bhoi, u Bah Michael T. Mate, ryngkat bad kiwei kiwei ki riew rangbah.
Ha kaba kut jong ka prokram, la sam ïa ki syrnod sha baroh ki samla kiba la ïashim bynta ha kane ka jingïakop, bad ki khusnam sha kito ki samla kiba la wan ha ki kyrdan ba ha khmat.
Ki samla kiba la jop bad shah jied na kane ka kyrdan District Level kin ïoh ban mihkhmat ïa ka Ri-Bhoi District ha ka State Level. Nangta, kito kiba lah ban jop ha ka State Level kin ïoh pat ïa ka lad ban jam sha ka National Level, ha khmat u Myntri Rangbahduh ka Ri India, u Narendra Modi.