Na kti ki Sohpyut ki kruiñ, mih ki Sahep sorkar, ki Doktor, ki Engineer wat ki Politician

Ther kylla ki nonghikai ïa u Bah Prestone ha Nongpoh

0
Nongpoh, Naiwieng 17: Ki nonghikai skul Deficit na Ri-Bhoi District, hapoh ka lama jong ka Khasi-Jaintia Deficit School Teachers’ Association (KJDSTA), mynta ka sngi ki la mih paidbah ban bteng ïa ka jingïakhih ha Madan Pahamsyiem, Nongpoh, bad pynrem jur halor ka jingkynthoh u Symbud Myntri Rangbah ka jylla, u Bah Prestone Tynsong, uba la kdew ïa ki nonghikai Deficit kum ki “kruin bad ki soh pyut” kiba pynsniew ïa ka pule ka puthi ha ka Jylla.
Kane ka jingïakhih ka long kum ka dak jong ka jingpyrshah ïa ka jingbym sngap jong ka sorkar jylla halor ki jingdawa jong ki nonghikai Deficit, kiba la buh hakhmat ka sorkar lyngba ki san tylli ki mat jingdawa. Ki nonghikai ki la pynpaw ba kin bteng ïa ka jingïatylli bad ka jingïakhih haduh ban da ïoh ïa ka hok kaba ki dawa.
Haba kren sha ki lad pathai khubor, u Babu Multon L. Nonglait, uba dei u Executive Committee Member jong ka KJDSTA, u la pynpaw ïa ka jingsngewkhia bad pynrem jur ïa ka jingkynthoh jong u Bah Prestone Tynsong, da kaba ong ba ka long kaba sngewsih ban ïohi ba uwei u nongïalam ba don kyrdan ha ka sorkar jylla un pyndonkam da kum kine ki kyntien pyrshah ïa ki nonghikai kiba la aiti ïa la ka por bad ka bor ban shakri ïa ka pule ka puthi.
U Babu Nonglait u la ong ruh ba ki sohpyut bad ki kruiñ kim ju pynmih ki soh ba bha hynrei na ki nonghikai kiba la ñiew kum ki “kruiñ bad ki soh pyut” ki mih ki briew kiba la noh synñiang shibun sha ka imlang sahlang, kynthup ïa ki ophisar, ki pulit, ki doktor bad wat ki nongïalam saiñ pyrthei kiba la leh ïa ki kam kiba bha na ka bynta ka jylla.
U la bynrap ba ka jingkynthoh kum kane kam long kaba ai mynsiem ïa ki nonghikai, kiba la trei shitom bad aiti met bad mynsiem ban kyntiew ïa ka pule ka puthi bad ban pynwandur ïa ka lawei jong ki khun samla. U la pynpaw ruh ba ki nonghikai ki dei ban ïoh ïa ka jingburom bad ka jingithuh ïa ka jingnoh synñiang jong ki, ym ban shah kynthoh ha kum kine ki kyntien.
Haba kren halor ka mat jong ka jingdawa “Equal Pay for Equal Work”, u Babu Nonglait u la ong ba ki nonghikai Deficit kim pyrshah ïa ka jingthmu jong ka sorkar ban kyntiew ïa ka jingsiew jong ki nonghikai SSA bad Adhoc. Hynrei, u la ban jur ba kano kano ka jingpynkiew tulop ïa kine ki kynhun nonghikai kam dei ban ktah ne pynduna ïa ka tulop bad ka hok jong ki nonghikai Deficit.
Ha kane ka sngi, u Bah Mathew Makdoh, Nominated MDC jong ka KHADC, u la wan ban ai mynsiem bad pynpaw ïa ka jingkyrshan ïa ki nonghikai kiba dang bteng ïa ka jingiakhih. U la pynrem jur ruh ïa ka jingkynthoh jong u Bah Prestone Tynsong, da kaba pynpaw ba ki nonghikai ki dei kiba don bynta kaba kongsan bha ha ka ban kyntiew ïa ka pule ka puthi ha ka jylla.
Leave A Reply

Your email address will not be published.