Lahduh ka Punjab da ki 5 tylli ki takma ksiar na ki 35 tylli ki Jylla bad UT nalor ki Unit

Pynhap pyrda u CM ïa ka NTPC Senior National Archery Championship

0
Shillong, Naiwieng 17 : Ka jingïakob siat khnam jong ka NTPC Senior National Archery Championship la pynkut noh ha kane ka sngi Ba-ar ha madan Parade, Umsawli, ha kaba la rai ïa ki 15 tylli ki nam lahduh jong ka ri ha ki lympung ïalehkai recurve, compound bad Indian Round.
Ïa kane ka jingïalehkai la pynlong da ka Archery Association of Meghalaya hapoh ka jingpeit jong ka Archery Association of India.
Ha kane ka sngi khatduh la donlang u Myntri Rangbah ka jylla u Conrad K. Sangma bad u Myntri ka tnad ïalehkai u Bah Wailadmiki Shylla, ha ryngkat u Bah Alertson Nongbri uba dei u director ka tnad ïalehkai, u Bah P.B. War Nongbri, Deputy Director ka tnad ïalehkai bad u President ka seng siat khnam jong ka jylla Meghalaya; bad ka Kong Matsiewdor War Nongbri kaba dei ka Vice President jong ka Meghalaya State Olympic Association bad kaba dei ruh ka Chairperson cum Chief Advisor.
U Myntri Rangbah ka Jylla Conrad K. Sangma haba ai jingkren ha kane ka jingïalang u la ong, “Nga ai khublei ïa baroh ki nongïalehkai ba la ïoh takma, kumjuh ruh ïa kiba la ïashim bynta, hynrei nga ai khublei ruh ïa ka Archery Association of India bad ka Archery Association of Meghalaya kiba la pynlong ïa kane ka Senior Archery Championship hangne ha ka Jylla.”
Na ka liang u Myntri ka tnad ïalehkai u Bah Wailadmiki Shylla u la ong, “Ka dei ka por kaba sngew sarong ïa ka Jylla Meghalaya, bad na ka bynta kane nga ai khublei ïa ka Archery Association of India bad ïa ka Archery Association of Meghalaya kiba la pynlong ïa kane ka Senior Archery Championship hangne ha Meghalaya.
Ha ka recurve, ka Maharashtra ka la jop lai tylli na san tylli ki nam lahduh, da kaba rah ïa ka mixed team gold pyrshah ïa ka Railways bad baroh ar tylli ki team gold, pyrshah ïa ka Haryana ha ka final ki kynthei bad ka Services ha ki shynrang.
Ka Jharkhand ka la jop ïa ka nam lahduh ha ka  women’s individual title pyrshah ïa ka Maharashtra, katba ka Delhi ka la khur ïa ka takma ksiar jong ki shynrang marwei pyrshah ïa ka Services. Ha ka compound, ka Punjab ka la jop ïa baroh ar tylli ki nam lahduh jong ki kynhun, ha kaba ka la pynliem ïa ka Uttar Pradesh ha ka phainal jong ki kynthei bad ka Madhya Pradesh ha ka final jong ki shynrang. Ka Delhi ka la khur ïa ka mixed team gold pyrshah ïa ka Uttar Pradesh bad ïa ka nam lahduh jong ki shynrang shimet pyrshah ïa ka All India Police Sports Control Board (AIPSCB), katba ka Telangana ka la khur ïa ka takma ksiar marwei jong ki kynthei pyrshah ïa ka Tamil Nadu.
Ha ka Indian Round, ka Rajasthan ka la rah ïa ka nam lahduh jong ka kynhun ïalehkai mixed team bad ki shynrang, ha kaba ka la pynliem ïa ka Uttar Pradesh bad ka Manipur. Ka Uttar Pradesh ka la ïoh ban khur ïa ka takma ksiar jong ka kynhun kynthei pyrshah ïa ka AIPSCB bad ïa ka nam lahduh jong ki kynthei shimet pyrshah ïa ka Punjab, katba ka Punjab ka la khur ia ka ksiar jong ki shynrang shimet pyrshah ïa ka Uttar Pradesh.
Baroh ki don 63 tylli ki takma kiba la ai ha ki 18 tylli ki Jylla bad ki board, 18 tylli ha ki jingkheiñ marwei marwei bad 45 tylli ha ki jingïalehkai ba ïakhun pyrshah.
Ka Punjab ka la don ha ka kyrdan kaba hakhieh duh ha kaba la khur bun eh ki takma ksiar, kata 5 tylli, katba ka Maharashtra ka la khur bun tylli ki takma, 10 tylli, ba kynthup ïa saw tylli ki takma ksiar. Ka Delhi ka la khur ruh saw tylli ki takma ksiar, lai tylli na kine ha ka sngi khatduh.
Leave A Reply

Your email address will not be published.