16-27 tarik u Naiwieng ka prokram ai jinghikai shaphang ka EVMs bad VVPAT
Jowai, Naiwieng 16: U Deputy Commissioner (Election) ka West Jaiñtia Hills District, ula pyntip paidbah ïaka EVM Awareness Programme yn pynlong ha baroh ki jaka thep vote kiba don ha baroh saw tylli ki Assembly Constituency kata ka 1-Nartiang, 2-Jowai, 3-Raliang bad 4- Mowkaiaw kaba la sdang naduh ka 16 tarik u Naiwieng haduh 27 tarik u Naiwieng, 2026.
Ïa kane ka jingai jinghikai sha ki paidbah yn pynlong lyngba ka Mobile Demonstration Van (MDV) ha ka jingïadon lang ki Sector Ophisar bad ki nongtrei ka elekshon.
Yn buh ruh ïa ka EVM Demonstration Centre (EDC) ha Ophis jong u Deputy Commissioner (Election), West Jaiñtia Hills District, Jowai, naduh ka 16 haduh ka 27 tarik Naiwieng, 2026. Ïa kane ka Centre yn plie lad ïa ki paidbah naduh ka por 10 baje mynstep haduh 1 baje nohphai sngi ha baroh ki sngi trei kam.
La kyntu ïa ki paidbah ban shim kabu da kaba leit mih ban ïashim bynta ha kitei ki prokram ai jinghikai khnang ba kin tip kham bniah halor ka jingtreikam jong ki EVMs bad ki VVPAT.