Ngam don jingeh ban pdiang ïakren bad ka JAC lada ki wan da kaba jai jai : Bah Paul Lyngdoh

0

Shillong, Naiwieng 15 : U Myntri ka tnad Tourism ka Sorkar Jylla, Bah Paul Lyngdoh ha ka sngi Saitjain u la ong ba u long uba kloi ban pdiang ïa ka JAC pyrshah ropeway lada ki wan sha ka miej jingïakren da ka lynti kaba jai jai bad ka jingïasngewthuh markylliang, ym ban pynleit jingmut tang ha ka jingpyrta bad ka jingpyrshah.
Haba kren bad ki lad pathai khubor, u Myntri u la ong, “Ngam don kano kano ka jingpyrshah lada ki wan da ka mynsiem ban ïa kren ym da kaba pynlong ïa ka jingïakhih.”
Katkum ka jingong jong u, kaba kongsan ha kane ka bynta ka long ban don ïa ka mynsiem ban sngap lang mar kylliang bad sngewthuh ruh ïa kaei kaba na ka liang jong ka sorkar ka don ban pynshai.
“Ka long kaba sngewsih ban ïohi ha ka por ba uwei na ki nongïalam ba la rangbah bad Myntri ha ka Sorkar Jylla u Bah Sanbor Shullai, u la khot sngewbha kyrpang ïa ki dkhot ka JAC ban wan sha ka jingïakren, hynrei ki kylla pynban sha ka jingjia kaba khlem khmih lynti,” u la ong.
Shuh shuh u laong ba kan ym myntoi ban pynlong ka jingïakren lada la shu pyrta haduh ba ym lah shuh ban sngap ïa kaei kaba kiwei ki ong.
U Bah Paul Lyngdoh u la buh jingkylli ruh ïa ka por ba ka jingpyrshah ïa ka projek Shillong Ropeway ka la mih, watla ïa kane ka projek la sdang naduh u snem 2022.
“Ha kane ka bynta, nga kwah ban pynkynmaw ïa phi ba ïa kane ka projek la sdang naduh u snem 2022. Kumba phi tip, ha katei ka por ngam pat long satia u dkhot jong ka Ïingdorbar Thaw Aiñ ka Jylla,” u la ong.
U la pynshai ba ïa ka Memorandum of Understanding (MoU) la soi ha ka 16 tarik Kyllalyngkot 2023, ha ka por ba u dang long tang u kyrtong sha ka elekshon MLA, bad ba ïa katei ka MoU la soi ha ka samoi treikam jong ka Sorkar MDA-I.
U la kylli, “Ka jingkylli kaba kongsan ka long, balei kane ka kynhun kam shym la pynpaw ïa kijuh ki jingpyrshah kiba ki pynpaw mynta? Kaei kaba la jia naduh u snem 2022 haduh mynta?”
U la ong ba ha ka sien kaba nyngkong ba u la shimti ïa ka tnat Jngohkai Pyrthei kum u Myntri ha u snem 2023, u la bat ïa katei ka kam la kumba ar snem shiteng. Hynrei, ha baroh katei ka por, ym shym la don mano-mano ba la wan sha u ban pynsngew ïa ki jingud, ki jingeh ne ki jingsngewkhia halor kane ka projek.
“Ha ka sien kaba nyngkong ba nga la shimti ïa ka tnat Jngohkai Pyrthei ha u snem 2023, nga la trei kum u Myntri la kumba ar snem shiteng. Ha baroh katei ka por, ym don mano-mano ba la wan sha nga ban ong ba ngi don kine ki jingud, ki jingeh ne ki jingsngewkhia kiba ka Sorkar ka dei ban pynbeit. Ym shym la don satia kum kine ki jingjia ha katei ka ar snem shiteng,” u la ong.
Watla katta, u Bah Paul u la pynpaw ba u dang kwah ïa ka JAC ban wan shakhmat ban pynsngew ïa ki jingsngewkhia jong ka, da kaba ong ba kam pat dier por satia ban pynlong ïa ka jingïakren. U la ong ba ka Sorkar ka long kaba kloi ban sngap ïa ki, bad ki dkhot ka JAC ruh ki dei ban long kiba kloi ban sngap ïa ka liang jong ka Sorkar.

Leave A Reply

Your email address will not be published.