Na ki jhur sha u dragon fruit, ki skhim sorkar ki plie lad kamai ba thymmai ïa ki nongrep ha Garo Hills

0

Shillong, Naiwieng 15: Ki nongrep ka South West Garo Hills ki nang wad ïa ki kam rep bapher bapher da ka jingkyrshan na ki skhim sorkar, kaba pynlah ïa ki ban kyntiew ïa ka jingmih ha ki lyngkha, ban shim ïa ki rukom rep kiba mynta bad ban kyntiew ïa ka ioh ka kot kaba kham bun.
Ka kynhun ki nongthoh khubor na Shillong, kum shi bynta jong ka press tour ba la pynbeit da ka Directorate of Information and Public Relations (DIPR), ki la leit ban jngoh ïa ki katto katne ki projek rep ha ka distrik ban pynpaw ïa ka jingiaid shaphrang jong kine ki jingthmu bad ki lad ki lynti na ka bynta ki nongrep trai shnong.
Ha ka shnong Harigaon kaba hap hapoh ka Rerapara Block, kane ka kynhun ka la leit jngoh ïa ka jaka rep jong u Nerdaya Koch, uba la trei ïa ka kamrep organic ïa ki jhur bapher bapher naduh u snem 2013-14.
Da kaba rep ïa ki jhur ha ka por lyiur bad ha ka por lyiur ha kylleng ka jaka kaba 1.5 hectare ha u snem 2026, u Koch u la ioh jingmyntoi na ka jingiarap ba man ka por ba la ai da u Ophisar jong ka District Horticulture, South West Garo Hills, Ampati, hapoh ka Vegetables Development Scheme.Ka jingiarap ka kynthup ïa ki symbai kiba bha (Quality Hybrid), ki jait symbai kiba ai jingmih bha ne ka high-yielding variety (HYV) bad ki open-pollinated seeds ha ka jingiarap kaba 75 percent subsidy, ryngkat ki fencing nets, ki jaka buh symbai, ki cocopeat bad ki tin ai um ha ka jingiarap kaba 50 percent.La pynbiang ruh ïa ka polyhouse bad ki jingthung ba neh na ka bynta ki jhur creeper ryngkat bad ka jingiarap kaba 100 percent.
Kine ki jingiarap ki la pynlah ïa u ban kamai kumba T. 7-8 lak ha u snem 2025-26 na ka jingrep jhur.Nalor ka jingrep jhur, u Koch u la rung ruh ha ka kam rep symbai, da kaba pynheh ïa ki symbai ha ki tray hapoh ka polyhouse kaba heh 100 meter bad pynbiang ïa ki sha kiwei pat ki nongrep ha ka dor Rs. 2.50 na ka bynta kawei ka jingthung.
Shuh shuh u la nang pynpher ïa ki kam jong u da kaba rep ïa u soh watermelon ha kylleng ka jaka kaba 0.4 hektar hadien ka jingkheit ïa ki jhur ha ka por lyiur ha u snem 2025-26, ha kaba u la ioh ïa ka jingmyntoi kaba la antad ban long T. 3-4 lak tyngka.Ka tnad ka la kyrshan ïa kane ka jingthmu da kaba ai ïa ki symbai ha ka jingiarap kaba 75 per cent na ka Vegetables Development Scheme.La buh ruh ïa ka Drip irrigation hapoh ka bynta jong ka Per Drop More Crop (PDMC) jong ka Pradhan Mantri Krishi Sinchayee Yojana (PMKSY) ha u snem 2025-26.
Ka kynhun ka la leit jngoh ruh ïa ka jaka rep dragon fruit jong u Robelson M. Marak ha Ampati Songma, uba la shim ïa ka kam rep organic ïa u dragon fruit ha u snem 2023.Ka jingkheit jong u ha u snem 2025 ka la ai kumba 80-100 kg, kaba la pynmih ïa ka jingmih kumba T. 35 hajar-50 hajar tyngka.
Ka jingrep jong u ka la ioh jingkyrshan na ka tnad lyngba ka jingpynbiang ïa ki tiar thung, ki drip irrigation hapoh ka Mission for Integrated Development of Horticulture (MIDH) ha u snem 2022-23, bud sa ka jingiarap kaba kham bniah hapoh ka Fruit Development Scheme ha u snem 2025-26.
Ha Zikzak Horti Hub, ki nongthoh khubor ki la leit jngoh ïa ki lai tylli ki polyhouse ba la pynwandur hapoh ka Rural Infrastructure Development Fund (RIDF) na ka bynta ban rep ïa ki soh Anthurium, Gerbera bad Dendrobium, ha kaba kawei kawei ka jaka ka don ka jingheh kaba 500 square metre.
Katei ka projek, kaba kynthup ïa ka jingheh kaba 1,500 square meter ha ka jinglut kaba la kot sha ka T. 70 lak, la mynjur ha ka 7 tarik u Lber 2023, bad la pyndep ha ka 1 tarik u Iaiong 2025.La pyntreikam lyngba u supplier, M/s Phira Enterprise, Shillong, kane ka jaka mynta ka pynmih pisa kumba T. 2 lak shi snem na ka jingdie ïa ki syntiew ba la ot.Hynrei ka jinglah ban kamai jong ka projek ka la shah khanglad namar ka jingpynslem ban siew na ki nongthied jong ki tnat treikam.
Kawei pat ka jingthmu ba la leit jngoh ka long ïa ka Vertical Column Method na ka bynta u Soh marit, ba la pyntreikam hapoh ka Rashtriya Krishi Vikas Yojana (RKVY) ha u snem 2023-24.Ia kane ka projek la pyndonkam bha ïa ka jaka katba ka pynlah ban pynmih bun ki tiar thung kiba bha.
Da ka jinglut ba la mynjur kaba long T. 36.62 lak, ïa kane ka projek la thmu ban kynthup 1,000 square metre, ha kaba don 300 column bad 3,000 tylli ki jingthung jong u Panniyur-2.Hynrei ka jingpyntreikam ka la duna ïa ki thong ba la mynjur, da kaba pynroi ïa ka jaka kaba kham rit, la pynieng 198 tylli bad la pynbiang bad thung 1,920 tylli ki jingthung.Ka dei ka Serve Well Agro Solutions, Shillong, East Khasi Hills District, kaba la mynjur ban supply.
Ka jaka mynta ka pynmih arsien ïa ki jingthung ba la ot ha ka shisnem, ïa kiba la pyndonkam na ka bynta ban pynheh ïa ki symbai ha ka jaka thung.

Leave A Reply

Your email address will not be published.