32 snem shah ieh beiñ ka surok Photmula – Ditumtum ha ka sorkar

Jurip ka KSU bad ki nongïalam shnong

0

Mawkyrwat, Naiwieng 15: Ka KSU jong ka South West Khasi Hills District lem bad ka KSU jong ka Ranikor Circle ha ka sngi saitjaiñ jong ka taïew hapoh ka jingïalam u bah Forwardman Nongrem, President KSU South West Khasi Hills District bad u bah Marconi Thongni, President KSU Ranikor Circle ki la hiar ban ïakynduh ki nongïalam shnong bad ki nongshong shnong jong ki 5 tylli ki shnong kata ki nongïalam jong ka shnong Myriaw, Ditumtum, Pyndenlaru, Kolongboit bad ka Photeitsim ki la jurip ruh ïa ka surok naduh lad Photmula shaduh Ditumtum kaba jngai kumba 9 kms ei ei. Ha kane ka jingleit jurip la lap ba kine ki shnong lada shim kyllum ki don kumba 200 tylli ki longïing bad kumba 1000 tam ki nongshong shnong hynrei kaba sngewsih ka long ba kine ki shnong kim pat biang ka surok mynta la kumba 32 snem naduh ba la sdang ban shna ïa ka kata ha ki snem 1994/96.
Ha kane ka jingleit jurip ki nongshong shnong ki la ud bad pynsngew ba ka jingsniew bad jingbym pynbha ïa kane ka surok ka la buh jingeh shikatdei eh ïa ki nongshong shnong la ka long ban pynsuk ban pynpoi ïew pynpoi hat ïa ki mar rep bad khamtam eh ha ka por ka pang ka shitom namar ka surok ba tang 9 kms hynrei ka shimpor da ki kynta ba kin poi sha surok bah jong ka surok Mawsynram – Ranikor.
Kane ka jingeh lada na ka liang ka sorkar kam lah ban thaw lad mardor khlem pep kan wanrah jingeh hadien habud bad wat ki jingjia ba sngewsih lada hap poi kyrkieh sha ki jaka sumar ïa ki nongshong shnong haki por ba ki donkam kyrkieh ïa ki jingsumar.
Ha kane ka sngi na ka liang ka KSU lem bad ki nongïalam snong lem bad ki paitbah jong kine ki 5 shnong ki la shim rai ba shen kin sa leit ban ïa kynduh ïa u bah Pius Marweiñ, MLA ka Ranikor Constituency lem bad ïa u Myntri ba dei peit ïa ka PWD Department jong ka sorkar Meghalaya bad kiwei kiwei ban dawa ba dei ban maramot bad pynbha mardor ïa kane ka surok lem kumta ka seng lem bad ki nongshong shnong kim banse ban hap shim da kiwei ki lynti bad ki sienjam.

Leave A Reply

Your email address will not be published.