Kham pynjem ïa ki kyndon ka FCRA, kyrpad ka Sorkar Meghalaya ïa ka JPC

0

Shillong, Naiwieng 15 : Ka Sorkar Meghalaya ka la kyntu ïa ka Joint Parliamentary Committee (JPC) ban bishar biang ïa katto-katne ki kyndon jong ka jingtyrwa pynkylla ïa ka aiñ Foreign Contribution (Regulation) Act (FCRA), namarba ki lah ban ktah beit ïa ki kynhun Khristan bad ïa ka imlang sahlang jong ki Khristan.
Haba pyntip ïa kane, u Symbud Myntri Rangbah ka Jylla, Bah Prestone Tynsong, u la ong ba ka Sorkar Jylla ka la dep ban pynsngew ïa ka nongrim jong ka sha ka JPC bad kyrpad ïa ka ban pynkylla ïa katto-katne ki kyndon jong kane ka aiñ.
“Ngi la dep ban pynsngew ïa ka jingmut jong ngi hakhmat ka Committee bad ngi la ai ruh ïa ka jingpynshai sha ka JPC, da kaba kyrpad ïa ka ban bishar biang ïa kitei ki kyndon,” u la ong.
U la bynrap ba ka nongrim jong ka Sorkar Jylla ka long ban pynkylla ïa katto-katne ki bynta jong ki jingtyrwa pynkylla ïa ka aiñ bad ba ki kyndon kim dei ban long kiba eh palat.”
U la ong ba ka Sorkar kam pyrshah ïa ka jingpynkylla ïa ka aiñ FCRA, hynrei ka sngew ba don katto-katne ki kyndon kiba eh palat bad kiba dei ban pynjem.
U Bah Prestone u la kdew ba ïa ka aiñ FCRA la dep ban pynkylla teng mynshwa, kynthup ha ki snem 2010 bad 2012 ha ka por jong ka Sorkar Congress. U la ong ba ka jingpynkylla ïa kane ka aiñ mynta ruh ka long kaba donkam bad kaba kongsan.
Hynrei, u la pynpaw ba ka Sorkar Jylla ka don ka jingsngewkhia halor katto-katne ki kyndon kiba lah ban ktah ïa ki kynhun Khristan bad ïa ka imlang sahlang jong ki Khristan.
“Don katto-katne ki bynta jong ki jingtyrwa pynkylla kiba ngi sngew shimet ba kin ktah beit ïa ki kynhun Khristan bad ïa ka imlang sahlang jong ki Khristan,” u la ong.
Haba kylli halor ka jingkyrpad jong u Dr. W.R. Kharlukhi, u MP barim ka Rajya Sabha bad President barim ka NPP ha ka Jylla, ïa ka BJP bad NPP ba kin vote pyrshah ïa ka Bill FCRA haba wanrah ïa ka ha Parliament, u Bah Prestone u la kyntait ban kren halor kane ka bynta.
“Ha kane ka por, ngam don eiei ban ong namarba ka Joint Parliamentary Committee ka dang bishar ïa kane ka kam,” u la ong.
Shuh shuh u la ong ruh ba ka JPC ka dang bishar bniah ïa kane ka mat bad ka dang lum ïa ki jingai jingmut na ki kynhun bapher-bapher.
U Bah Prestone u la pynkynmaw ruh ba dang shen ka JPC ka la wan sha Shillong bad ïakynduh ïa ki nongmihkhmat jong ki kynhun bapher-bapher kiba don bynta ha kane ka kam.

Leave A Reply

Your email address will not be published.