Ïoh jinghikai ki nongïoh penshon ban pyndonkam ïa ka Jeevan Pramaan App na ka bynta ka Digital Life Certificate
Shillong, Naiwieng 15 : Ka ophis jong u Controller of Communication Accounts (CCA), North East-I Telecom Circle, Shillong, ha ka sngi Palei ka la pynlong ïa ka prokram hapoh ka Digital Life Certificate (DLC) Campaign 5.0 kaba la pynlong ha kylleng ka ri ha khrum jong ka CTO Building, Shillong, ban pynsuk bad ai jinghikai ïa ki nongïoh penshon jong ka BSNL bad ka tnad Department of Telecommunications (DoT) ban pynbiang ïa ki Digital Life Certificate (DLC) lyngba ka App Jeevan Pramaan.
Ïa kane ka prokram la pynlong kum shi bynta jong ka jingthmu jong ka tnad Department of Pension and Pensioners’ Welfare (DoPPW) ka Sorkar India, kaba la pynlong ha baroh kawei ka ri.
Hapoh kane ka Campaign 5.0, ka ophis ka thmu ban kynthup haduh kumba 1,400 ngut ki nongïoh penshon jong ka North East-I Telecom Circle, kiba ka por jong ki Digital Life Certificate kan kut noh ha u Naiwieng 2026, khnang ban pynthikna ba kin pynbiang ïa ki certificate ha ka por kaba biang bad ban lait na ka jingthut ha ka jingsiew ïa ka penshon.
Ha kane ka prokram, kumba 25 haduh 30 ngut ki nongïoh penshon ki la wan shim bynta bad pyndonkam ïa ka jingshakri ban pynmih bad phah ïa ki Digital Life Certificate jong ki.
Ki ophisar bad ki nongtrei jong ka ophis CCA, North East-I Circle, ki la ai jingïarap bad batai ïa ki nongïoh penshon kumno ban pyndep ïa kane ka kam lyngba ka mobile App Jeevan Pramaan.
La pynleit jingmut kyrpang ruh ban ai jinghikai ïa ki kumno ban pyndep hi dalade ïa kane ka kam lyngba ki mobile phone jong ki napoh iing, khnang ban pynduna ïa ka jinghap leit bunsien sha ki ophis bad ki bank. Nalor ka jingshakri ban pynbiang ïa ki Digital Life Certificate, la pynlong ruh ïa ka prokram jingpeit sumar ei ïa ka koit ka khiah (free health check up) na ka bynta ki nongïoh penshon khnang ba kin ïoh ïa ki jingshakri kiba donkam ha ka liang ka koit ka khiah ryngkat bad ka jingïarap halor ki kam pension.
Ka ophis jong ka CCA, North East-I Telecom Circle, ka la ïai ban biang ïa ka jingkular jong ka ban ai ïa ka jingïarap kaba donkam sha ki nongïoh penshon jong ka BSNL bad DoT, bad ka la kyntu ïa ki ba kin pyndonkam hok ïa ka App Jeevan Pramaan ban pynbiang ïa ki Digital Life Certificate ha ka por kaba biang bad khlem jingeh.