Umsning, Naiwieng 13: Hadien ka jingud jingnam jong ki paidbah nongshong shnong halor ka jingsniew palat jong ka surok Umsning, kaba la palat 10 snem khlem kano kano ka jingpynbha, ka Seng Khasi Student Union Umsning Circle ka la leit ban ïakynduh ïa ki bor ba dei peit jong ka tnad PWD (Roads), Umsning, ban pynsngew ïa ka jingeh jong ki paidbah bad ban dawa ïa ka jingpynbha mardor ïa kane ka surok.
Kane ka surok ka sdang na Lad Umtrew, kaba ïaid lyngba ka ïew Umsning bad bteng haduh Lad Umsning Nongthymmai, kaba don ïa ka jingjrong kumba 4.20 kilometre.
Ha ka jingïalam jong u President, Samla Lester Nongbet, bad u General Secretary, Samla Laraplang Nongbri, ryngkat bad ki dkhot jong ka Umsning Circle, ka seng ka la leit sha ophis jong ka PWD (Roads), Umsning, ban ïakynduh ïa u Engineer. Hynrei, namar ba um shym la don ha ophis ha katei ka por, ka seng ka la ïakynduh noh ïa u SDO ka PWD Umsning, u Bah Pynwandur Damblong, ha kaba ka la aiti ruh ïa ka dorkhas kaba pynpaw ïa ki jingeh bad ka jingud jong ki paidbah halor ka jingsniew jong kane ka surok.
Haba kren sha ki lad pathai khubor, u President ka seng, Samla Lester Nongbet, u la ong ba la palat 10 snem tam mynta ba kane ka surok, kaba sdang na Lad Umtrew ter ter haduh Lad Umsning Nongthymmai, kaba jrong 4.20-kilometre, ka la shah iehbeiñ khlem da don kano kano ka jingpynbha, hynrei haduh mynta la shu maramot shipor da kaba pyndonkam da u maw bad ka khyndew.
U la pyntip ruh ba ka seng ka la ai por tang 30 sngi ïa ka tnad PWD (Roads), Umsning, ban shimkhia bad pynbeit ïa kane ka jingeh. Lada ka tnad kam shimkhia hapoh katei ka por, ka seng kan sa shim ïa ki sienjam kiba kham tyngeh.
Shuh shuh, u la pynpaw ba ka jingsniew jong kane ka surok kam dei tang ka jingeh ïa ki paidbah nongleit nongwan, hynrei ka la wanrah ruh ïa ka jingma bad ka jingmynsaw, khamtam eh ïa ki khynnah skul kiba pyndonkam man ka sngi ïa kane ka surok ban leit sha ki jaka pule.
