Jowai, Naiwieng 13: U MLA ka Jowai, uba long ruh u Myntri ka tnat ïalehkai Sports bad kiwei, u la wan ban pynhap pyrda ïa ka jingïalehkai Badminton kaba la tip kum ka 1st Open to All Badminton Tournament-2026, ïa kaba la pynïaid da ka Loomiongkjam Primary Unit, jong ka National People Party, 2-Jowai LA Constituency ha kane ka 12.11.2026. ïa kane lympung la pynlong ha Seiñraij Indoor Sports Complex, Tpep-Pale (Madan Ryngkaw) Jowai.
Kane ka lympung ka dei kaba la sdang naduh ka 11 tarik bad kut noh ha kane ka 12 tarik mynta u bnai Naiwieng. Ha kaba ki nongïalehkai kiba la shim bynta ha kane ka lympung ki long tang kiba hap hapoh ka Jowai LA Constituency bad ha kane ka lympung la wan ban ïashim bynta haduh 68 ngut ki nongialehkai.
Haba phai sha ki jingïakhun ha kane ka lympung, ha ka kyrdan Open Men’s Double 85yrs+, ïa ka nam lahduh la ïoh rah da u Damehi Kyndait bad u Arkiyoo Passah da kaba pynliem ïa u Da-u-ru Laloo bad u Recall Kyndiah. Ha ka kyrdan 75 + Men’s Double, ïa ka nam lahduh la ïoh rah da u Da-u-ru Laloo bad u Ram Najiar kiba la pynleim ïa u Daymenio Shullai bad u Dr Peterson Lamar. Katba ha ka Open Men’s Double ïa ka nam jop la ïoh rah da u Gregores Passah bad u Deilang wa-o Nongpluh.
Ha kane ka sngi la sam ïa ki khusnam bad syrnot sha ki nongjop bad ki nongïashim bynta ha kane ka lympung, da u kongsan u ma Wailadmiki MLA ka thaiñ bad Myntri ka sorkar jylla, ha ka jingïadonlang u President Primary Unit Loomiongkjam Dr. D.I. Kjam, General Secretary ma Wandame Challam, Primary Unit Loomiongkjam, ma Teddy Laloo bad kiwei de ki riew rangbah kiba donlang ha kane ka janmiet.
Ha kane ka sngi ka Loomiongkjam Primary Unit kala pynkup burom ruh ïa u ma Teddy Laloo, uba la don bynta ban pynlong ïa kane ka Tournament kaba ïaid beit ïaid ryntih bad kaba jop.
