Lai snem duna, marwei hap hikai na ka bynta ki 175 ngut hapoh Pyndenlyngdoh Pres. Def. LPS: Nonghikai

Mawkyrwat, Naiwieng 12: Ka Hynñiewtrep National Youth Front (HNYF) jong ka South West Khasi Hills District hapoh ka jingïalam u Bah Shainingstar Wanniang, President ryngkat ki dkhot hadien ka jingud jingnam ki paidbah ha ka 10 tarik u Nailur 2026 ka la hiar jurip ia ka skul Pyndenlyngdoh Presbyterian Deficit Lower Primary School kaba don ha ka shnong Pyndenlyngdoh, South West Khasi Hills District.
Ïa ka skul Pyndenlyngdoh Presbyterian Lower Primary School kaba dei ka Deficit skul la seng naduh u snem 1956.
Ha kane ka jingjurip ka seng ka lap shibun ki jingduna hapoh kane skul naduh nonghikai, ki kamra klas bad ka jingduna nongtrei hapoh ka Mid – day – Meal.
La ïoh ban iakren ruh bad ka nonghikai jong kane ka skul kaba la ïathuh ia ki jingeh jong ka ban hikai marwei ïa ki khynnah kiba don kumba 175 ngut hapoh kane ka skul hadien ka jingkhlad noh jong uwei u nonghikai la kumba lai snem duna bad kaba sngewsih ka long ba ka sorkar haduh mynta ka khlem thung bujli shuh.
Hadien ka jingjurip, u bah Bah Shainingstar Wanniang, President jong ka Hynñiewtrep National Youth Front (HNYF) jong ka South West Khasi Hills District haba kren ha ki lad pathai khubor ula buh ka jingkyrpad ïa ka sorkar ba kam dei ban leh ‘mei-nah ïa ki skul nongkyndong namar bunsien ki ‘riew shemphang ki ‘riew khraw ki mih na ki skul nongkyndong.
Ha kajuh ka por, u la ong ruh ba ka sorkar ka dei ban thung noh kloi ïa ka post nonghikai hapoh kane ka skul, ban shna shuh shuh ïa ki kamra klas hapoh kane ka skul namar kumba long mynta ki don tang ar tylli ki kamra ha kaba ki la hap ban pynshong lang hajuh ka kamra ïa ki khynnah kiba pule la ki jong ki kyrdan bad kawei de ka jingkyrpad ka long ban thung biang ïa ki nongtrei Mid – day – Meal hapoh kane ka skul.