Ka Maverick City Music yn pynïaid beit da ka KSP Assembly, ym don bynta ka sorkar

Shillong, Naiwieng 12: Hadien ba la mih ka jingïakren ba bun jait halor ka Maverick City Music, ka KJP Assembly kala mih sha khmat ban pynshai da kaba ong ba ïa kane ka Concert yn tip lut nadong shading da ka KJP Assembly bad ka sorkar kam don bynta eiei hynrei ka shu ïarap ïa ki jingdonkam.
Haba ïa kren bad ki lad pathai khubor u Rev. S Diengngan uba dei u Administrative Secretary KJP Assembly u la ong ba ka sorkar kan ïarap ha ki bynta jong ka VISA bad kiwei kiwei de ki jingdonkam.
Haba phai sha ka phang u Rev. S Diengngan u la ong, Ka KJP Assembly ka dap da ka jingkmen ban pyntip ba ka jingpynkhreh na ka bynta ka gospel concert ha kaba ki nongrwai khristan ba pawnam ha ka pyrthei ka Maverick City Music kin tem live ha nongbah Shillong ka la iaid shaid shaid.
“Ïa kane ka concert la pynlong tang da ka KJP Assembly ban pynmih pisa na ka bynta ki projek bapher bapher jong ka kiba hadien habud kin long ka jingmyntoi ïa ki paidbah nongshong shnong ka jylla” ong u Rev Diengngan.
Lait na ka bynta ka jingmane jong kane ka jingthmu ba kongsan, kane ka concert kan ïarap ban kyntiew ïa ka jingsngew shipara bad ka jingsuk hapdeng ki jaidbynriew kiba shong basah ha Meghalaya, khamtam, katba ka paraba ngeit ki dang pynkhreh ïa ka jingwan jong ka Khristmas bad ki jingrakhe kiba don jingmut jong ka aiom jong ka jingkmen, ong u Rev Diengngan.
Shuh shuh u la ong, Katba ka jylla ka dang ïakhun tyngeh pyrshah ïa kiba bun ki jingsniew ha ka imlang sahlang kum ka jingngop ki khun samla kiba la kyrni ha u drok, kum kine ki jingmane blei kyrmen kin pynjan ïa ki samla sha ki jinglong ba kordor jong ka jingngeit, ka jinglong babha bad ka jingkitkhlieh.
Ka KJP Assembly ka dang ïatreilang mynta ha ki projek ai jingïarap bapher bapher kiba ai jingmyntoi ïa ki hajar ngut ki briew kiba donkam jingïarap, katto katne na ki na ki bynta ba shah iehnoh beiñ bad da ka jingkhmih lynti ïa ka jingïashim bynta jong ki ba sngewtynnadïa ka jingrwai gospel, ki riewngeit Presbyterian bad ka imlang sahlang jong ki Khristan, ki jingpyrshang ban lum pisa kum kane kawei kan pynlong ïa ka jingpher ha ka jingim jong kito donkam ha ka jingim.
U Administrative Secretary ka KJPA, u Rev. S.Diengngan u ong, “Ha kane ka gospel concert, ym tang ki paidbah ki ban wan kin ïoh ïa ka jingkyrkhu, hynrei da ki hajar ngut kiba donkam jingïarap kin ïoh jingmyntoi na kane ka concert” Ha ryngkat, ki nongïoh khusnam Grammy Award na Maverick City Music na Atlanta, Georgiatcer, USA kane ka concert kan plie lad ruh ki samla nongrwai khristan ban rwai jingrwai gospel ban rwai ia ki jingrwai ryngkat sur.Napdeng ki nongrwai na kane ka thaiñ, ki ba kynthup ïa ka Mane music ministry, Amazaiah, Ka Sur na Nongkyndong bad El King. Ha kane ka Concert yn sakhi ruh ïa ka jingrwai Choral jong ki standing choirs na ki lai tylli ki Synod kiba don hapoh ka KJPA.
Ban pynsuk ïa baroh kiba kwah ban wan bad ban long shi bynta ha kane ka concert, ki tiket ki don ha kine ki bynta, kata, Silver: ?1,000, Gold: ?2,500 bad ka Patron’s Lounge: ?10,000.
Lait na ka jingdie tiket online lyngba ka rockskitickets.com, ki bor pynïaid ïa kane ka concert kin plie ïa ki jaka die tiket offline khnang ban pynsuk ïa ki briew ha ka jingthied ïa ki tiket ha Shillong, Jowai, Nongstoiñ, Nongpoh, Mairang, Khliehriat, Sohra, Pynursla bad kiwei kiwei ki sor rit.