Nongstoiñ, Naiwieng 12: U Bah Methodius Dkhar MLA ka Mawshynrut u ba long ruh u myntri ka sorkar jylla, ha ryngkat ki ophisar ka tnad PWD, ki rangbah jong ka balang Katholik bad kiwei, ha ka sngi palei jong ka taiew ki la hiar ban jurip ïa ki katto katne ki bynta jong ka surok kaba don ha ka thaiñ Maweit. Kane ka jinghiar jurip ka long kum shibynta ka jingpynkhreh jong ka balang Katholik ïa ka Proseshon ka ban sa long shen.
Ka jingleit jurip jong u myntri u ba long ruh u MLA jong katei ka thaiñ, ka long shibynta ban pyntikna ba ki surok kiba hap ha ki bynta ban ïaid Proseshon, ki dei ban long kiba la dep siang rong lut khnang ba ki riewngeit ka balang Katholik kiba ïashimbynta ha ka ban ïaid Proseshon kin lah ban ïaid beit khlem jingwit.
Ïa kitei ki surok la bei tyngka lyngba ka sorkar jylla Meghalaya haduh 3 klur tam ei ei bad ki don haduh 2 kilometer tam ka jingjngai. Na ka liang u bah Methodius u la kyntu jur ïa ki kontraktor ba kin pyndep noh hapoh ka 13 tarik u Nohprah 2026, namar ka jingdonkam kam dei na ka bynta ka jingmyntoi jong kano kano ka seng saiñpyrthei, hynrei ka long kaba la donkam kyrkieh na ka bynta ki parabangeit jong ka balang.
Kiwei kiwei kiba la donlang ha kane ka sngi ki long u bah Srally Rashir MDC ka Mawshynrut, u Phadar Wilfred Kharpuri, Society of Jesus, Parish Priest ka St. Ignatius Loyola Maweit Parish bad kiwei kiwei ki riew rangbah jong ka Balang.
