Manla ka sngi ha ki Kotkhubor la pynbna laitkam nonghikai, kumno phin ong ba khang ka sorkar: Myntri

Shillong, Naiwieng 11 : U Myntri ka tnat Pule Puthi jong ka Sorkar Meghalaya Bah Lahkmen Rymbui ha ka sngi Balang u la kyntait ïa ka jingkynnoh ba ka Sorkar ka khanglad ïa ki skul Deficit ban pynbna ïa ki kam nonghikai kiba shong thylli.
Haba pynshai halor ka jingkynnoh ki nonghikai, u Myntri u la ong ba ki nonghikai kiba pynlong ïa ka jingïakhih ki dei ban peit bniah ïa ki jingpynbna ha ki kot khubor, namar ki kam nonghikai kiba lait ki dang mih man la ka sngi.
” Peit bha ha ki kot khubor mynta, don ne em ki jingpynbna na ka bynta ki nonghikai? Man la ka sngi ki don beit ki jingpynbna ïa ki kam nonghikai,” u la ong haba kren bad ki lad pathai khubor.
U la pynshai ruh ba lada don ki skul kiba ym don khynnah ba wan skulk um ïa kita ka Sorkar kam lah ban pyllait kam nonghikai ha kum kine ki skul.
“Lada don zero enrolment, kumno ngin pyllait kam? Hynrei ïa kaba dei hok, phi peit bha ïa ki jingpynbna ha ki kot khubor. Kumta, ban kynnoh ba ka Sorkar ka khanglad ïa ki kam thung nonghikai kam dei kaba shisha,” u la ong.
Haba kren halor ki jingeh jong ki skul, u Myntri u la ong ba ka Sorkar ka long kaba kloi ban sngap ïa ki jingeh bad ki jingdonkam jong ki School Managing Committees (SMCs).
“Ki School Management Committee ki wan sha ngi lada ki don kino kino ki jingeh. Lada ki wanrah ïa ki jingdonkam jong ki lyngba ki jingthoh, ngi ju peit bad leh ïa kaba donkam,” u la ong.
U la bynrap ba ka tnat Pule Puthi ka shimkhia ïa ki jingtyrwa bad ki jingdawa jong ki committee bad ka pyrshang ban pynbeit ïa ki jingeh katkum ka jingdonkam.