DHAKA, Naiwieng 11: Ka penalty jong u Suhail Ahmad Bhat ha ka minit kaba 38 bad ka jingïada kaba kongsan na u Priyansh Dubey ha ka khyllipmat ba khatduh ka la ïarap ïa ka India ban pynskhem ïa ka jaka ha ka semi final jong ka SAFF Championship hadien ka jingjop kaba da 1-0 kol pyrshah ïa ka Maldives ha ka jingïalehkai ba khatduh jong ki ha ka Group B ha National Stadium, Dhaka hynne ka sngi Balang (11 tarik Naiwieng, 2026).
Ka India, kaba bat ïa ka nam lahduh, ka la pynkut ïa ka jingïalehkai group stage da kaba kamai 6 point, hakhmat ïa ka Pakistan kaba khur 3 point, katba ka Maldives ka la khyllem noh khlem da kamai point.
Ka India kan ïakhun pyrshah ïa ka Bangladesh, Bhutan lane Sri Lanka ha ka semi-final kaba la buh ha ka 14 tarik Naiwieng.
U Head coach u Naushad Moosa u la wanrah hynñiew tylli ki jingkylla ïa ka kynhun kaba pynliem ïa ka Pakistan da 3-2 kol, da kaba pynneh pynsah ïa u Abhishek Suryavanshi, Muhammed Uvais, Suhail Ahmad Bhat bad u Ricky Shabong ha ka bynta jong ki. U Priyansh Dubey u la bujli ïa u Arsh Anwer Shaikh kum u nongap kol, katba u Chinglensana Singh Konsham u la shimti kum u kapten hadien ba u Bijoy Varghese u la iehnoh ïa ka kynhun na ka bynta ka jingïalehkai paralok pyrshah ïa ka New Zealand.
U Bhat u la ïoh ban tynjuh ïa u Hussain Shareef da ka jingpyrshang kaba tyngeh tang hadien katto katne por ba la sdang ka jingïalehkai, hynrei ka India ka la hap ban ap ïa ka penalty ban ïoh lamkhmat. Kane ka penalty ka la jia hadien ba u Abdul Rabeeh u la shah pynur hapoh box da u rangap dien ka liang pyrshah. U Bhat u la pynkhihjar da kaba shut ïa ka penalty na liang kadiang.
Kane ka kol ka la kyntiew ïa ka jingkheiñ jong u Bhat sha ka lai kol hadien ba u la pynkhihjar ar sien ha ka jingjop jong ka India ïa ka Pakistan. U Manglenthang Kipgen u la thep ïa kawei pat ka kol jong ka India ha katei ka jingïakhun.
U Irfan Yadwad bad u Kipgen ki la mih bujli ha jaka jong u Rabeeh bad u Nickson mar ïa sdang ka kylla miet. Katba u Vishnu PV u la mih bujli ha jaka jong u Bhat ha ka minit kaba 65.
La sakhi ruh ïa ka sap ba kyrpang na u rangap kol u Dubey, uba la khanglad ïa ka free-kick jong u Ali Hamdhaan ha ka minit kaba 79 bad ka jingpyrshang thep kol jong u Muzdhaan Hassan hadien 5 minit. Ka jingïada kaba kongsan tam jong u, ka la wan ha ka minit pynjlan shuwa ban kut, ha kaba u la mareh shakhmat bad khanglad ïa ka jingpyrshang jong u Ethan Ibrahim Zaki, da ka durkhmat jong u. Ka jingtrei shitom jong u Dubey ka la ïarap ban pynneh pynsah ïa ka kol lamkhmat jong ka India bad pynkut ïa ka jingïalehkai khlem da shah thep.
India: Priyansh Dubey (GK), Chinglensana Singh Konsham (C), Abhishek Suryavanshi, Abdul Rabeeh (Manglenthang Kipgen 46’), Muhammed Uvais, Suhail Ahmad Bhat (Vishnu PV 65’), Khaiminthang Lhungdim, Ricky Shabong, Macarton Nickson (Irfan Yadwad 46’), Sandip Mandi, Brison Fernandes (Ebindas Yesudasan 78’)
