Bah Prestone bad ka sorkar dei ban kren beit haba shit ba shai ban ka ong ‘em’ ïa u uranium : HANM
Mawkyrwat, ‘Nailar 01: Ka Hynniewtrep Achik National Movement (HANM) jong ka South West Khasi Hills District hapoh ka jingïalam jong u bah Lambokstar Marweiñ uba dei u President u la phah ka kyrwoh sha ka sorkar bad kumjuh ruh sha u Symbud Myntri Rangbah jong ka Jylla, bah Prestone Tynsong ba haba ki kren halor u ‘Uranium’ ki dei ban kren beit haba shit ba shai ban ong ‘EM’ ïa ka jingtih ne klong ïa u.
Haba ai jingkren ha ki lad pathai khubor, ha ophis treikam jong ka seng ha Mawkyrwat, u u bah Lambokstar Marweiñ u la pynpaw ba kum ka seng HANM ha ryngkat ki dkhot jong ka ki ïeng skhem ha ka nongrim kaba khlaiñ ban, “Ong em ïa ka jingtih ïa u Uranium” wat lada ka sorkar India haduh mynta ka dang ïai pyrshang ban thaw ki lad ki lynti ban ïoh ban tih ïa u marpoh khyndew ne u uranium uba don hapoh jong ka dong ka thaiñ ha South West Khasi Hills District.
“Da kaba shai ka seng kan ïeng skhem ban ïeng ïaleh pyrshah wat lada kan poi ha u pud ban kthong ïa ki nongïalam bad ïa ki dkhot jong ka seng”, ong u bah Lambok bad u la ong ruh ba kin ym kynran dien da lei lei hynrei kan ïeng ïaleh ban pyrshah beit lada ka sorkar ka thom da ka bor.
Namarkata, u la kyntu ïa u bah Prestone Tynsong, Symbud Myntri Rangbah jong ka Jylla ba lada ma u bad ka sorkar kan ym shah ban tieh ïa u uranium u dei ban kren shai hapoh jong ka Ïing Dorbar thaw aiñ (Assembly) ym ha madan madiah. Ha kajuh ka por ka seng HANM ka la kyntu ruh ïa baroh ar ngut ki nongmhkhmat jong ki ar tylli konstitwensi kata u bah Renikton Lyngdoh Tongkhar, nongmihkhmat jong ka Mawkyrwat bad u bah Pius Marweiñ u nongmihkhmat jong ka Ranikor ba ki kren ei ei halor kane ka bynta khnang ba ki jingpyrshang ne ki buit tuh jong ka sorkar India kin pulom ei noh.
U bah Lambokstar Marweiñ uba dei u President jong ka HANM, South West Khasi Hills District u la khot bad wer ïa baroh ki sengbhalang kiba don hapoh ka distrik bad ha ka jylla Meghalaya baroh kawei ba kin long kiba ïatylli ban ïeng skhem ha ka nongrim ban pyrshah halor ka jingthmu jong ka Sorkar India ban wan ban tih ïa u marpoh khyndew u ba don ha kane ka South West Khasi Hills District.