La pyllait paidbah ïa ka ‘Aadhaar Authentication Programme’ ha South West Khasi Hills District

Mawkyrwat, ‘Nailar 01: Ha ryngkat ka jingïasnohkti lang bad ka ri India baroh kawei, ka ophis jong ka Deputy Commissioner (Election) jong ka South West Khasi Hills District mynta ka sngi ka la ïoh ban plie paidbah ïa ka ‘Aadhaar Authentication Programme’ (AAP) ha kaba u S.C. Laloo, MCS, Additional Deputy Commissioner (Election), South West Khasi Hills District u la long u kongsan.
Haba kren ha ka jingïalang u bah Laloo u la ong ba kane ka program mynta ka sngi ka kham long kaba kongsan namar ka dei kawei na ki program kaba ïa dei bad ka Election Commission jong ka Ri India ha kaba ka la pyllait paidbah ïa ka ‘Aadhaar Authentication Programme’ ka ban pynïasnoh ïa ka EPIC CARD jong ngi bad u Aadhaar. U la ong ruh ba kane ka program ka long ruh ban ai jingpynshai ha ki paidbah shaphang ka jingdonkam ban don ïa kane ka ‘linkage’ ha kaba kin hap ban pyndap ïa ki phom ka ban sdang naduh mynta ka sngi ka 01 tarik u ‘Nailar mynta u snem.
U la pynshai ruh kane ka jingïalang ka long kaba kyrpang ha kaba la khot lang ïa ki ophisar, ki nongïalam jong ki party, ki nongïalam shnonbad kiwei kiwei namar dei lyngba jongki ki ban ïarap ban sam lem ïa ki jingtip bad jingpynshai sha ki paidbah, khnang ba kin sngewthuh kumno ban leh nangne shakhmat. Shuh shuh u la pynshai ruh ba ha kane ka kynti ba mynta ki la don ki format kiba thymmai bad yn sa batai bad pynsngewthuh ym tang na ka bynta ki nongtrei sorkar bad kumjuh ruh ha baroh ki paidbah nongshong shnong khnang ba kin tip shai ïa ka jingdonkam jong kane ka format kaba la ai da ka Election Commission jong ka Ri India (ECI).
U la pynshai shuh shuh ba ha ka form 6B na ka liang ka Election Commission jong ka Ri India (ECI) ka la ai laitluid na ka bynta kito kiba la don ïa u Aadhaar ne ki bym pat don Aadhaar ba kin pynïasnoh bad ka EPIC lyngba ki 11 jait ki kynja kot ne documents ba ki lah ban pynshisha kum ka Job Card, ka Passbook, ka Health Insurance Smart Card, ka Ration Card, ka Pan Card, Driving License, ka Pass Port, ka Service Identity, ka Smart Card, ka Official Card jong ki MLAs/MDCs bad ka UDID.
“Ka jingjop ha ka elekshon kam dei ka tang ka jingjop na kawei ka liang hynrei ka dei lyngba ka jingïatreilang jong baroh naduh ki paidbah, ki ophisar ba kynthup ruh ïa ki BLO’s”, ong u bah Laloo. Shuh shuh u la ai mynsiem bad pynshlur ïa baroh kiba la sha kane ka jingïalang namar khlem ma ki kin nym lah ban pyntyllun ïa kiba bun ki kam bad kan long hi thik kum ‘ka lieng kaba ïaid khlem ka boitha’.
Namarkata, u la ong ba napoh ka ophis jong ka Deputy Commissioner (Election), South West Khasi Hills District ka buh ka jingkyrpad ïa baroh ba kin ai ka jingïatreilang ha ki liang baroh namar khlem ka jingïatreilang yn nym lah ban pyntyllun sha khmat ïa ka kam bad u la buh ruh ka jingkyntu na ka bynta ki nongtrei sorkar ruh ba kin pyntyllun ïa ka kam da ka jingieit, jingshitrhem bad jingtrei shitom.
Ban pynshit pynshngaiñ ïa kane ka prokram, la ïoh ruh ka jingrwai kyrpang na ka samla Lapdiang Nongsiej ryngkat ka jingsakhi bad ïadonlang jong ki ophisar na ki tnad treikam bapher bapher, ki nongïalam shnong bad kiwei de kiba napoh jong ka South West Khasi Hills District bad kynthup na ki ar tylli ki block na ka Mawkyrwat bad kumjuh ruh na Ranikor Block.
Ha kane ka sngi la ïoh ruh ka jingmaitphang halor kane ka prokram da u bah L. Marthong, MCS, EAC (El), South West Khasi Hills District ryngkat ki kyntien pdiang sngewbha bad ka jingkren khublei na u bah W. Biam, MCS, Additional Deputy Commissioner, South West Khasi Hills District.