Kylla khongpong ka jingkular ai Khristmas u CM ïa ka KSU, khlem hun ka jingpynkhreh ka Facilitation Centre ha Umling

Nongpoh, Naiwieng 10: Hadien ba ka ophis u Deputy Commissioner ka Ri-Bhoi kila khot biang ïaki nongïalam ka KSU sengkmie ban leit jurip biang ïaka Facilitation Centre kaba don ha Umling mynta ka sngi ki nongïalam ka KSU naduh u Samla Raymond Kharjana President, u Samla Pynkmenlang Sanmiet Vice President, Samla Reuben Najiar Secretary lem bad ki nongïalam ka KSU North Khasi Hills District hapoh ka jingïalam u Bah Ferdinald Kharkamni kum u President lem bad ki dkhot mynta ka sngi kila hiar sha Umling ban jurip biang ïa katei ka Facilitation Centre haka jingdonlang ki sahep ophisar ka district naduh u Bah Erick Dkhar BDO ka Umling C&RD Block, u Bah B Nongkynrih Tourist Officer ka Ri-Bhoi lem bad kiwei kiwei.
Na ka liang u Samla Raymond Kharjana haba kren sha ki lad pathai khubor u la ong ba ha katei ka jingjurip naka liang ki nongïalam ka KSU kila pynpaw ba kim sngewhun ïa katei ka jingjurip ha kaba ka jingkular u Myntri Rangbah ban kular ai sngewbha Christmas sha ka KSU da ka Facilitation Centre ka long da khongpong bad kam don kano kano ka jingpynkhreh naka liang ka sorkar ha kaba naka liang ka seng ka khmihlynti ba kane ka dei ka sien ba khatduh ban jurip bad mih da ka jinghun hynrei ka long da khongpong.
U la ong ruh ba ka jaka bala pynkhreh naka bynta ban pyntreikam ïaka MRSSA ka long kaba rit katba ka jingheh jong ka jaka bam ne food court ka long ar ne lai shah, bad naka liang ka seng kala buh jingkylli ruh ki tnad sorkar aiu ki ban don ban treikam ha katei ka Facilitation Centre, hynrei naka liang ki bor ba dei peit kim lah ban ai ïaka jubab, bad kane ka seng ka pynpaw ka jingsngewbynñiaw namar kane kam dei shuh ka mat kaba dang thymmai hynrei tang ki jingkular na kawei ka sngi sha kawei pat bad haka jaka ba ka sorkar kan shimkhia ïa jingpyntreikam ïaka MRSSA pynban ka shimkhia haba ïadei bad ki jaka bam.
Haba ïadei bad katei ka jingjurip, naka liang u Bah Raymon u la ïathuh bala pan ruh ïaka DPR bad kiei ki tnad sorkar ki ban don ha katei ka Facilitation Centre, hynrei ki bor sorkar bala mihkhmat ha katei ka sngi kim lah ban ai ïaka jubab, bad kane ka pynpaw ba ka sorkar kam shimkhia ïa kane ka mat, bad kum ka seng kam sngew don nongrim shuh ban buh por sha ka sorkar halor ka jingpyndep ïa katei ka jingdawa.
Shuh shuh halor kane ka jingbym hun ïa katei ka jingjurip bad ka jingpynkhreh jong ka sorkar naka liang ka seng kan sa shong pyrkhat biang ban shim pat da kiwei ki sienjam ba tyngeh khnang ba ka sorkar kan pynkloi ïa kane ka mat.