Hato ka jingkhih khohreh ban pynïaid shakhmat ïa ka Ropeway project ka dei ba kwah ban pynlut noh ka ram na ka NDB? 

Ha ka jingïapyni bor na bynta ka ropeway ha Lum Shyllong, la ïohi ba ka sorkar jylla, ka la sei madan lut ïa ki jingtip, kiba ka don bad kiba ka la buhrieh la saw snem kynthih.

Ha ka kyrwoh khubor, kaba dang ha ki khyndiat por ba ladep, la pyni ba u Bah CV Diengdoh, uba dei U CEO jong ka Meghalaya Ropeway Development Authority, ula pynshai ba katei ka projek, ka dei kaba la ïoh ïa ka jingmynjur na ka sorkar India, lane ka bym hap ha ki kyndon A lane B jong ka Environment Impact Assesement bad kumta kim donkam satia ban ïawer ïa ka jingïakren paidbah halor kane ka mat.

Kaba pynpyrkhat, ka long ba ha katei ka kyrwoh, la pyni ba ïa katei ka projek, la ai jingmynjur da ka Indian Air Force, Indian Army bad ka Airports Authority of India bad ka mat hangne, ka mih ïa kaei ka bynta jong kitei ki lai tylli ki tnat, ba kin ai jingmynjur, haba ka jingtrei ka dei ïa ka ropeway bad kam dei ïa ka kam pynher liengsuiñ lane ka kam ïaleh thma bad kaba lyngngoh shuh shuh, ka long ba lada ka jingtrei ropeway ka poi sha kitei ki tnat shipai, kumta ka don jingeh aïu te ban leit pan jingmynjur na ki paidbah jong katei ka thaiñ kiba mad ïa ka jingïoh ne jingduh jingmyntoi na katei ka ropeway lane na U Syiem Hima Mylliem bad nangta sa na ka District Council?.

Sa kawei kaba pyndum buit tyngeh ka long, ba na ka jingshah pom noh jong ki dieng kiba don kumba 500 tynrai ha u Lum Shyllong, hana ka tnat ropeway kan leit thung bujli da 5 hajar tynrai, ha ki bynta jong ka West Khasi Hills bad katei ka dei ka rukom pyrkhat kaba mutlop haduh katta katta, ha kaba ki bor sorkar, ki ïoh ïa ka jingstad aïu, ba ki dieng lane ka um lane ka jingshit jingkhriat kaba la duh na Lum Shyllong, kin pynmih bujli da kitei ki tynrai dieng, ki ban don kumba 200 haduh 300 Km antad na Shillong?

Ha ka khubor, la pyni shuh ba ki tyllong um, ki don kumba 500 metre na ka jaka ba don ropeway bad katei kam pat don eiei, ha uba leit ïeng kai pyngngad ban dih sikret, leit pynjhieh lane ban sait kti sait kjat ha katei ka pung um jong ki nong Laban.

U Bah Paul Lyngdoh, Myntri thymmai ka tnat shang pyrthei, mar ïa shimti ïa katei ka kam, ula kren shai ba ka jingtrei kan ïaid beit bad lada ka jingthmu jong ka sorkar ka long ha katei ka dur, ka long ba ka khohreh palat ban pynlut noh ïa ka pisa kaba shu shim ram na ka New Development Bank (NDB), kaba ngim tip, ka dei kaba naei katei ka Bank bad kaba hap siew u paid nongshong shnong ka jylla, ïa katei ka ram bad kam dei ruh kaba la bei pisa da ka sorkar India bad katei ka pyni, ba ka dei ka projek kaba la kwah palat da ka sorkar Meghalaya pynban.

Kane ka jingïakynad kaba la sdang khamjur mynta naduh ka Sngi Thohdieng ha kaba ki dkhot jong ka Joint Action Committee kaba pyrshah ïa ka Shillong Peak Ropeway Project ka la sdang syndon da ka jingïakhih shong kyllaiñ myngor ban pynbor ïa ka Sorkar ba kadei ban pyndam noh ne rah noh shawei ïa katei ka projek ropeway sha kiwei ki jaka ne ki shnong kiba donkam shisha.

Lah ban ong ba ki nongïalam jong ka JAC ki la hap ruh ban shim ïa ka lad ban ther tyngeh sa ïa la u jong u MLA u Bah Sanbor Shullai uba la sngap jar jar ïa kane ka jingïakhih jong ki kaba ki la kam ba kadei kaba shong nongrim.

Ki la kam ruh ba nalor ba ki la pynjop ïa u kum u MDC bad kumjuh ruh kum u MLA bad mynta ba u la bat bad ïoh ïa ka shuki Myntri Sorkar u la klet pat ban peit ïa ki jingeh ki nongshong shnong ba ki mad ha kane ka por, kumta ki la kyntu ïa u MLA ban kren eiei noh halor kane ka mat bad ka phang kaba ïadei ruh hapoh ka Constituency jong u.

Na ka liang ki longkmie ym tang ba ki la ther ïa la u jong u MLA hynrei ki la ther kylla bad tyngeh ruh ïa u Myntri Sorkar u Bah Paul Lyngdoh uba khmih mynta ïa ka Tnat Jngohkai Pyrthei ne Tourism uba la kynthoh bad uba la ïathuh lut baroh halor ki jinglong jingman bad ki jingpyrshah jong ki longkmie, ka Green Tech Foundation bad jong ka Joint Action Committee.

Shuh shuh kumba la ïohi ha kine ki sngi naduh ba la sdang ka jingïakhih shong kyllain myngor jong ka JAC kaba la ïaid mynta ha ka sngi kaba lai kane ka kynhun ka la pynpaw beit da kaba shai ba kan ym kynran dien na kane ka jingïakhih tat haduh ba ka sorkar jylla lyngba ka tnat Tourism kan pynkutnoh ne wah noh shawei ïa kane ka projek.