Shillong, Naiwieng 08 : U President ka Congress ha Meghalaya, u Bah Vincent H. Pala, u la ong ba ki jingkhang jong ka seng ki dang plie ïa u MLA ka Nongthymmai Bah Charles Pyngrope, tangba u ong pat ba u dei ban shim ïa ka rai kaba skhem khlem da kylla jingmut shuh.
Katkum ka jingong jong u Bah Vincent Pala, u Bah Charles u la ju kular bunsien ban kyrshan ïa ka Congress hynrei ki ju don pat ki khep ba kane ka jingkular kam ju urlong satia. Tangba u la ong pat ba ha ka elekshon MDC kaba dang shu dep une u nongmihkhmat u la leh shisha da kaba pynieng ïa uwei u kyrtong na ka tiket Congress.
“Nga sngewburom ïa u Bah Charles Pyngrope, uba nga ju ñiew kum u nongïalam uba don sap bad uba lah ban long u nongïalam ha ki sngi ban wan, hynrei nga sngewdei ban ong ba donkam ba un don ïa ka rai kaba skhem.”
Related Posts
Shuh shuh u ong ba u Bah Charles u dei u briew uba bha bad ki paidbah ki ieit bad burom bha ïa u. “Hynrei lada u dang bteng ban pynkylla ïa la ka seng bad ka rai, kane kan ktah ïa ka jinglong hok jong u,” la bynrap biang u Bah Pala.
Shuh shuh u la bynrap ba u dang kwah ïa utei u nongmihkhmat ban wan biang sha ka Congress, tangba u dei pat ban jied ïa ka jinglong bashisha bad ban ïeng skhem ha la ka rai.
Katkum ka jingong jong u, mynta u Bah Charles u dang don ha ka jingpyrkhat ban wan sha ka Congress.