New Delhi, Naiwieng 06: Ka Tnad treikam jong ka sorkar pdeng kaba dei peit ia Information & Broadcasting ka la lah ban pyndep ïa ka Campaign kaba 6 kaba la pynlong naduh ka 2 tarik u Risaw haduh ka 31 tarik u Risaw, 2026, da kaba pynleit jingmut ha kaban kyntiew ïa ka khuid ka suba, ban pynbeit ryntih ïa ka rukom sumar ïa ki jingthoh bad ki kot ki sla, bad ban pynduna ïa ki kam kiba dang sahteng ha ki ophis bad ki tnat Media Unit jong ka.
Ha kane ka campaign, ka tnad treikam jong ka sorkar pdeng ka la lah ban weng ïa 1,63,213 kilo ki tiar ki ba la jot kaba la lah ban pynkylluid ïa ka jaka treikam haduh 40,278 square phut. La lah ban pynduh pyndam ruh haduh 35 tylli ki kali. Ha kane ka campaign, la sakhi ia ka jingpynlong ia ki 1,348 tylli ki prokram pynkhuid ïa ki jaka ba shabar, ha kaba 1,519 tylli ki jaka la ioh ban pynkhuid ïa ka.
Ha kajuh ka por la iohi ruh ia ka jingkiew shaphrang kaba khraw ha kaba pynbeit ryntih ïa ka rukom sumar ïa ki jingthoh bad kot ki sla, bad ban pynbeit ïa ki kam kiba dang sahteng. La bishar bniah ïa baroh 39,545 tylli ki kot ki sla kiba don ha ka dur ba la shon (physical files), na kine, la wengnoh 8,823 tylli. Kumjuh ruh, la bishar bniah ïa 12,609 tylli ki kot ki sla ha ka dur elektronik (e-files), bad la pynkutnoh ïa 11,199 tylli ki file ha ka por jong kane ka campaign.
U Myntri ka Sorkar Pdeng ba dei peit ïa ka Tnad Information & Broadcasting, Railways bad Electronics & Information Technology, U Ashwini Vaishnaw, u la ïakren bad ki heh ophisar jong ka tnad treikam ka sorkar pdeng bad ki Media Units jong ka, ha ka por ba dang pynkhreh ïa kane ka campaign. U la ban jur ïa ka jingdonkam ban pynpoi ïa kane ka campaign sha baroh ki ophis, kynthup ïa ki tnat treikam kiba don ha ki kyrdan kiba shaduh sha tbian bad u la bthah ba ka jingpynkhuid ïa ki jaka treikam kam dei ban kut tang ha ka 31 tarik u Risaw, 2026, hynrei ka dei ban long ka jingpynmlien ha ka ban pynkhuid ka ba man la ka por. U la ban jur ruh badei ban kham khein kor ïa ki ophis kiba ai shakri ia ki paidbah.
U Secretary jong ka Tnad Information & Broadcasting, u Chanchal Kumar, u la bteng ban bishar bniah ïa ka jinglong jingman bad ka jingiaid shaphrang jong kane ka campaign. U la ban jur ba ki Media Units ki dei ban pynlong ïa ka khuid ka suba kum ka jingmlien ba man la ka sngi bad ban bteng ïa ka mynsiem jong ka Swachhta Hi Seva wat hadien ba la pynkut ia kane campaign, da kaba pyndon ïa ka jingkitkhlieh ha ka ban pynkhuid ha man la ka por, bad kaba long ka bynta kaba kongsan jong ka rukom treikam ha ki jaka trei.
Ki station jong ka Akashvani ha kylleng ka ri ki la pyntreikam, kynthup ïa ka jingwengnoh ia ki file bad ki kot ki sla kiba rim ha Kolkata, ka jingpynbha biang ïa ka jaka ka ba lah shah iehnoh khlem jingsumar bad ka ba don u dieng Banyan ha Cuttack, bad ki sienjam ban pynkylla ïa ki jaboh sha ki mar kiba don jingmyntoi ha Himmatnagar, Gujarat, ha kaba la pynkylla ïa kawei ka dish kaba la rim bad bym pyndonkam shuh sha ka jaka shong ïa ki nong ap pahara. Ka Akashvani Jodhpur ruh ka la pynlong ïa ki ka jingpynkhuid bad jingweng ïa ki jaboh, katba ha NABM, Bhubaneswar, la pynlong ïa ka prokram pynkhuid ïa ka park jong ki khynnah.
Kiwei pat ki Media Units ki la iashim bynta ha kaba pynlong ïa ki sienjam kiba thymmai ban pynkhuid bad pynitynnad ïa ki jaka treikam ha ka por jong kane ka campaign. Ka IIMC, Kottayam, ka la pynitynnad ïa ka campus lyngba ka jingdro dur ha ki kynroh, katba ka Doordarshan Kendra Srinagar ka la pynlong ïa ka prokram pynkhuid da ka jingïatreilang bad ka Tnad Forest bad ka CRPF ha Shankaracharya Hill. La pynlong ruh ïa ki jingpynkhuid ha ka Doordarshan Kendra Dehradun, ki ophis jong ka PIB bad CBC ha Ahmedabad, bad ha ka Directorate of Publications Division ha New Delhi.
Ka jingpynbna paidbah ha kaba iadei bad kane, la pynlong lyngba ki lad pathai khubor ba la shon (print media), ki lad pathai khubor elektronik bad ki lad pathai khubor social media, ban pynsaphriang ïa ka jingsngew thuh shaphang ka jingkhuid jingsuba bad ban pynshlur ïa ki paidbah ba kin ïa shim bynta.
Ka jinglah ban pyndep ia ka Campaign 6.0 ka bakyrpang ka pyni ia ki jingiaineh bad jingbteng jong ki tnat treikam ka sorkar pdeng ban shim khia ia ka khuid ka suba, ka jingpynbeit ryntih ia ki kot ki sla, ban pyndep ia ki kam kiba dang sahteng bad ban kyntiew ia ka rukom ai jingshakri ia ki paidbah.
