Dang ap ïa ka jingpynbna na ka ECI ban pynlong elekshon MP shiteng samoi ïathuh u CEO

Shillong, Naiwieng 05: Hadien jong ka jingthylli ka shuki Member of Parliament (MP) sha ka Lok Sabha na Shillong Parliamentary Seat, ka Sorkar jylla ha ka sngi Palei ka la shong bishar ïa ka jinglong ba la pynkhreh ban pynlong ïa ka elekshon shiteng samoi da haba pynleit jingmut ruh ïa ki jingdonkam ha ki Polling Station bapher bapher kiba hab ha kane ka Constituency.
La ïathuh ba ïa kane ka jingïalang bishar kam la pynïaid bad bishar da u Chief Secretary ka Jylla u Shakil P Ahammed (IAS).
Haba iadei bad kane, haba kren hadien ka jingïalang, u Chief Electoral Officer (CEO) u Dr BDR Tiwari ula ong ba ki bor treikam jong ka Jylla ki la long kiba la khreh bad shu ap satang ïa ka jingpynbna jong ka Election Commission of India (ECI) halor ka elekshon shiteng samoi ha ka Shillong Parliamentary Constituency.
Halor kane, na ka liang u CEO u la pyntip, “Katkum ki jingdonkam, ngi la long kiba la khreh ban pynlong ïa ka elekshon shiteng samoi ha kano kano ka por ba pynbna da ka ECI.”
U la ïathuh ruh ba ïa ka jingïalang la pynlong na ka bynta ban pynthikna ba baroh ki jingdonkam kiba kongsan kin long kiba la biang lypa hashuwa ka sngi thep vote.
Ha kane ka jingïalang, na ka liang ki Tnad kiba khmih ïa ka umbam umdih, ka paiñkhana, ki miej ki shuki, ki ramp, ka pule puthi, ka rural development, PHE bad Power kila wan ban ïashimbynta.
U Chief Secretary ula bthah ïa ki ban buh hakhmat eh ïa ki kam ba donkam ha ki polling station, kynthup ka jingpynpoi bording elektrik ba shipor lyngba ka MePDCL.
Haba kylli lano ka elekshon shiteng samoi kan long, u Tiwari ula ong, “Kan shong ha ka (ECI), kumta ngim lah ban kynthoh eiei. Ngi la dep pynkhreh lut nadong shadong. Ha kano kano ka por ba ka ECI ka rai, ngin sa pynlong ïa ka elekshon shiteng samoi.”
Haba batai ïa ka jingbuh por, ula ong ba kam don satia ka jingbuh por ba thikna ba 30 lane 45 sngi.
“Shisien ba lait thylli ki shuki, ka ju long barabor ba dei ban pynlong ïa ka elekshon hapoh ka hynriew bnai ba lait thylli ka shuki, hynrei lada don kino kino ki jingeh bad kiwei kiwei ki jingdonkam, ki lah ban shim kham slem,” bynrap u CEO.