Nongstoiñ, Naiwieng 05: Ka seng Indian National Congress ha ka jingïalam u bah Eric Kharsyntiew u ba long u President jong ka District Congress Committee West Khasi Hills, mynta ka sngi ka la leit ban ïakynduh ïa ka Hema Nayak IAS Deputy Commissioner ka West Khasi Hills District, ban ai ïa ka jingthoh halor ki katto katne ki bynta kaba ïadei bad ka jingpynkhreh ïa ka exam DSC.
U bah Eric u la ong ba ka seng ka dawa ba ïa ki jingkylli dei ban don hapoh ka jingset kaba biang khnang ba kin ym lait tuh. Hadien kata ïa ki marks kaba ki nongthoh ki la ïoh dei ban pyni ha ki Board khnang ba kin tip la katno ki la ïoh marks hadien ba ki la dep thoh.
Ha kajuh ka por ka seng ka la dawa ruh ba dei ban don da ki nongpahara kiba khlaiñ, khnang ba ki briew kiba nabar kin ym lah ban leit rung katba ki samla ki dang thoh exams namar ka jingleit rung jubor jong kiba nabar ka pynkyndit bad ka pynrit mynsiem ruh ïa ki khynnah.
Ka seng ka la leit ruh ban tynruh ha Nongstoiñ Police Station ban kylli pyrthew la ka jingjia kaba la jia dang shen kaba la don kiba kynnoh ïa ka jingïabam pisa ha ka thungkam thungjam hapoh ka DSC ka dei ne em kaba shisha.
Ka seng ka la ong ba lada ka dei kaba la jia shisha ne kam dei ruh, ki paidbah ki don ka hok ban ïoh jingtip noh kham kloi. Dei ruh ban shim kam noh mardor la ka dei pyrshah ïa kiba kynnoh ne kiba shah kynnoh.
