Nongpoh, Naiwieng 04: Ka ophis u Deputy Commissioner (Supply), Ri-Bhoi District, ka la kyntu ïa baroh ki nongpyndonkam LPG Gas (Domestic Consumers) hapoh ka district ban pyndep ïa ka jingpynthikna ïa ki Aadhaar lyngba ka Biometric Aadhaar Authentication (BAA), kaba la tip paidbah kum ka e-KYC, khnang ban ïoh ïa ka dor thied Gas (Refill Price) katkum ka dor ba la buh da ka sorkar, ryngkat bad ka jingmyntoi na ka subsidy kaba dei hok katkum ka jait connection jong ki.
Katkum ka jingpyntip, ïa kane ka jingpynshisha Aadhaar (BAA/e-KYC) donkam ban pyndep tang shisien. Kumta, kito kiba la dep leh ïa kane ka jingdonkam kim donkam shuh ban leh biang.
Ki nongpyndonkam LPG Gas ki lah ban pyndep ïa ka e-KYC lyngba ki nongtrei jong ki Gas Agency ha ka por ba ki leit buh ne shim ïa ki Gas Cylinder, da kaba pyndonkam ïa ka mobile application jong ka kompani Gas, da kaba leit mih sha ka ophis ne dukan jong ka Gas Agency ba ki ju shim gas, lyngba ki mobile App jong ki kompani, kata ka IndianOil ONE na ka bynta ki nongpyndonkam Indane Gas, HelloBPCL na ka bynta BharatGas bad HP PAY na ka bynta HP Gas.
Ha kajuh ka por, ïa ki nongpyndonkam gas kiba khlem kwah ne kiba ym lah ban pyndep ïa ka BAA/e-KYC, la bthah ba ki lah ban pynrung kyrteng ïa ka jingkwah jong ki lyngba ki digital channels jong ki kompani ba ki shim gas, khnang ba kin dang lah ban ïoh thied ïa ki Gas Refill ha ka dor ïew kaba pura khlem subsidy. Kane ka jingbthah ka kynthup ruh ïa ki tyndong cylinder kiba 5 kg bad 10 kg.
La maham ruh ba ki nongpyndonkam Gas kiba khlem pat pyndep ïa ka BAA/e-KYC kin ym lah shuh ban ioh gas (Gas Refill). Hynrei, kin lah ban bteng biang ban thied Gas hadien ba ki la pyndep ïa ka jingpynshisha Aadhaar lane hadien ba ki la pynrung kyrteng ïa ka jingkwah jong ki lyngba ka digital channel jong ka kompani ba ki shim gas.
La kyntu ruh ïa baroh ki nongpyndonkam LPG Gas hapoh ka district ban bud ryntih ïa kine ki jingbthah khnang ban pynsuk ïa ki bad ban pynthikna ba kin ïoh ïa ka gas ha ka por ba ki donkam. Lada don kano-kano ka jingeh ne jingkylli, ki lah ban leit ïakynduh ïa ki trai jong ki Gas Agency ba ki ju shim Gas lane ban wad jingïarap na ka ophis u Deputy Commissioner (Supply), Nongpoh, ha ki por trei kam.
