Nongpoh, Naiwieng 4: Ka tnat PHE lyngba ka ophis jong u Executive Engineer, PHE Nongpoh Division, mynta ka sngi ka la pynlong ïa ka prokram kyrpang ban rakhe ïa ka Jal Arpan Diwas ha AMKA Auditorium Hall, Umwang Them.
Ha kane ka prokram, u MLA ka Nongpoh, Bah Mayralborn Syiem, u la wan ban ïashim bynta kum u Kongsan, ha ka jingïadonlang u Bah U. Kurbah, Executive Engineer, PHE Nongpoh Division, bad u Bah A. Lyngdoh, Sub-Divisional Officer (SDO), PHE Nongpoh.
La wan ban ïashim bynta lang ruh da ki nongïalam shnong, ki dkhot jong ki Village Water and Sanitation Committees (VWSCs) na ki 16 tylli ki shnong ba marjan, ryngkat bad ki khynnah skul.
Ka jingrakhe ïa ka Jal Arpan Diwas ka long ka lad ban pynsngewthuh paidbah halor ka jingdonkam jong ka jingkitkhlieh lang ha kaba ïadei bad ka jingpynbiang ïa ka umbam umdih kaba khuid, bad kumjuh ruh ban pynneh pynsah ïa ki tyllong um na ka bynta ki pateng ban wan.
Ka Jal Arpan Diwas, kaba ju rakhe man la u snem kum shi bynta jong ka Jal Jeevan Mission, ka don ïa ka thong ban pynshlur ïa ki paidbah nongshong shnong ba kin shim ïa ka jinglong trai bad jingkitkhlieh ïa ki tyllong umbam umdih bad ki jingtei kiba ïadei bad ka umbam umdih ha ki shnong ki thaw. Kane ka jingthmu ka pynsngewthuh ruh ïa ki paidbah ba kim dei ban pynjot ne pynduh ïa ki tyllong um, hynrei ban thaw ïa ki lad ki lynti ban sumar bad pynneh pynsah ïa ki.
Kawei na ki bynta ba kongsan jong kane ka prokram ka long ka jingaiti ïa ki syrnod sha ki dkhot jong ki Village Water and Sanitation Committees (VWSCs) na ki 16 tylli ki shnong, kum ka dak jong ka jingpynithuh ïa ka jinglong trai bad jingkitkhlieh jong ki halor ki jingtei bad ki skhim umbam umdih. Kane kan pynlah ïa ki bor shnong ban shim ïa ka bynta kaba kham khraw ha ka jingsumar, pynïaid bad pynneh pynsah ïa ki tyllong umbam umdih ha ki shnong jong ki.
Nalor kata, la pynlong ruh ïa ka jingbam smai ha kaba baroh kiba la wan ïashim bynta ki la shim ïa ka jingkular ban long kiba don ka jingkitkhlieh ha ka ban ïada ïa ki tyllong um, ban kiar na kino-kino ki kam kiba lah ban pynjot ïa ki, bad ban trei shitom ban pynneh pynsah ïa ki khnang ba ki pateng ban wan kin ym mad ïa ka jingkyrduh umbam umdih.
