Sdang ka aïom ot hynrei syier ki nongrep ïa ka jinglong ka mei mariang

Nongstoiñ, Naiwieng 02: Ka jinghap slap ha kane ka taïew ba la dep ha kaba ki nongrep ki la sdang ban ot ïa u kba ha ki pynthor, ka la pyndiaw mynsiem eh khamtam ha kito ki jaka ba u slap u kham jur, namar u kba ba la dep ot u bym pat lum thup u la jhieh lut bad don ruh ki jaka kiba u kba u la per ha sla um.
Nangta don lei lei ki shnong bad ki jaka kum ha ki thaiñ Mynni Mawbri, Mawkynrum, Kohkam, Mawsnaireh, Mawshongkhyndew, Marskuiñ, Kyllang bad kiwei kiwei, ha kaba ki nongrep bad ki riew rangbah jong katei ka thaiñ ki la ong ba haduh 90% ei ei ka jingjulor na ka jinglynshop u phria bad jinghap slap kaba jur, ha kaba ka jingtrei shitom jong ki nongrep baroh shi snem ka la shu long lehnohei lut.
Ki la ong ba napdeng ki pynthor don kito kiba la shu ïa tam ïa u jyntang kba bad lum thup shi jaka hadien u ‘lapbah bad ka umsaw. Don ruh u kba ba la lum thup shi jaka ha ki pynthor ki hali satang ban shoh, hynrei la pra lut bad don lei lei ki jaka ba ki pynthor ki la kylla pung bad duh lut khait ïa u kba na u slap bah ha kane ka taiew ba la lah.
Kumjuh ruh watla naduh kane ka lah sngi u Blei, ka suiñbneng ka la sdang ban khuid, hynrei ki nongrep ki dang sngew syier ban ot ïa u kba namar kim tip pat ha ka por janmiet ka suiñ bneng kam pat da I thikna satia.
U bah T.Marweiñ uwei na ki nongrep kba ha ki thaiñ Umyiap, u la ong ba bun na ki nongrep ki la hiar sha ki pynthor kba ryngkat ki rashi ban ot ïa u kba, ha kaba don ki nongrep kiba ki kynthei ki nang ot, ki shynrang pat ki nang lum, khnang ba lada jïa ba u slap u hap bïang kin lah ban tap bad ban ïada na ka jingjhieh.
Haba phai ha ka jinglong jingman jong u kba ha une u snem, u la ong ba ki don ki jaka kiba u jyntang bad u soh ha man la ki pynthor kba. Hynrei don ruh kiba mad ïa ka jingdiaw mynsiem namar ka jingduna slap palat mynta u snem ha kaba don ruh kiba dang sdang ban thung haduh u bnai jylliew.
U la ong ba ki dang don ruh shibun ki lyngkha kiba ki nongrep ki dang hap ban ap sa kumba shitaïew tam ei ei haduh ba un da long ban ot. Lada u slap um hap shuh kan long ka jingkyrkhu kaba khraw ïa ki, hynrei lada jia ba ka mariang ka kylla da kumwei pat ka jingduh jong ki nongrep ka long kaba khraw.