Ki wan hi sha ka NPP ym dei ba ngi kwah pynduh jait ïa kiwei ki seng saiñ pyrthei: Conrad

Shillong, Naiwieng 02 : U Myntri Rangbah ka Jylla, u Conrad K Sangma bad National President jong ka NPP, u la ong ba ka jingwan pynïasoh jong ki MLA bapher bapher sha ka National People’s Party (NPP) ka dei ka rai shimet jong ki, da ka jingthmu ban pynkhlaiñ ïa ka party bad ïa ka Sorkar MDA.
U Conrad u la pynpaw ïa kane haba jubab ïa ka jingkynnoh jong ka Congress ba ka NPP ka thmu ban pynduh jait ïa ki sengsaiñ pyrthei kiba la ju ïatreilang bad ka, kynthup ïa ka People’s Democratic Front (PDF) bad ka United Democratic Party (UDP).
Haba kren bad ki lad pathai khubor, u Conrad U la kyntait ïa kane ka jingkynnoh bad ong ba ka NPP kam don jingthmu ban pynduh jait ïa kano kano ka party, hynrei ki MLA ki la rai hi ban pynïasoh sha ka NPP namar ka jingshaniah jong ki ha ka party bad ka jinglong nongïalam jong ka.
“Kam dei ba ngi mut ban pynduh jait ïa kano kan ka party hynrei dei ki MLA shimet kiba sngew ba ki kwah ban wan ïatreilang bad ka NPP bad ki la pynpaw ïa ka jingshaniah jong ki ha ka party bad ha ka jinglong nongïalam,” u la ong.
U Myntri Rangbah u la ong ba kane ka jingwan ïasoh kan ïarap ïa ka NPP ban pynkhlaiñ ïa lade bad ban pynlong ïa ka Sorkar kaba skhem ha ka jingtreikam jong ka, ha kane ka samoi bad ruh ban peit sha ka elekshon MLA jong u snem 2028.
U la bynrap ba ka NPP ka sngewkmen ba ki MLA ki wan ban pynïasoh sha ka party, hynrei u la ban jur ba ka jingthmu ba kongsan jong ka Sorkar ka long ban trei na ka bynta ka jingmyntoi jong ka Jylla bad ki paidbah.
U Conrad u la ong ruh ba ka jingskhem jong ka party ka long kaba donkam na ka bynta ka jingsynshar kaba bha, khamtam ha kaba ïadei bad ka bor ban shim ïa ki rai halor ki polisi.
U la pynthikna ïa ki MLA kiba la wan pynïasoh bad ka NPP bad ïa kito kiba la don lypa hapoh ka party ba ka Sorkar kan bteng ban trei da ka jingaiti lut bad ban buh hakhmat eh ïa ka jingmyntoi jong ka Jylla bad ki paidbah.