Ka jingkhang tih Dewïong ka long kumba shim noh ïa ka hok jong ki briew jong ngi ban kamai jakpoh: Dr. Kharlukhi

Shillong, Risaw 27: U MP barim ka Rajya Sabha, u Wanweiroy Kharlukhi, u la ong ba ka jingpynmih biang ïa ka kam tih dewïong ha Jaiñtia Hills ka dei ka kam kaba ïadei bad ka kamai kajih jong ki paidbah katei ka thaiñ, katba u la pynpaw ïa ka jingtieng halor ki jingkular ba la ai da ka Bharatiya Janata Party (BJP) halor ka jingpynbeit ïa katei ka jingeh.
U Dr. Kharlukhi, uba la rai ban kyrshan ïa u kyrtong jong ka seng Congress, u Bah Vincent H Pala, ha ka elekshon shiteng samoi jong ka Lok Sabha ban wan, u la ong ba u la ju rah beit ïa ka mat tih dewïong ha Parliament, da kaba kynthoh ba katei ka jingkhang tih dewïong, ka la ktah ïa ka jinglah jong ki briew ha Jaiñtia Hills ban kamai jakpoh.
U Dr. Kharlukhi u la long u dkhot ka dorbar parliament naduh u snem 2020 haduh u bnai Jylliew mynta u snemu la ong, “Ka jingtih Dewïong ka dei ka pdeng jong ka dohnud jong nga namar ba nga wan na Jaiñtia Hills. Nga la kren wat ha Parliament, nga la ong ba ka jingkamai ïa ka kamai kajih jong ngi ka dei ka hok tynrai, bad haba ki khang tih Dewïong ha ka District jong nga, nga sngew ba ki shim noh ïa ka hok jong ki briew jong ngi ban kamai jakpoh.”
Kane ka jingkren jong u ka long hapdeng ki jingpynthikna ba thymmai na ka BJP ba kan trei ban pynbeit ïa ka kam tih dewïong ha Meghalaya. Dei ka jingpynthikna jong ka seng saffron halor kane bad kiwei kiwei ki mat kaba la pynlong ïa ki 8 ngut ki MLA jong ka seng UDP ban phet noh sha ka BJP dang shen.
Hynrei u Dr. Kharlukhi u la kdew ba kum kine ki jingpynthikna la ai ha u snem 2023 hynrei kam shym la pynlong ban sdang biang ïa ka jingtih dewïong.
U la ong ba ka mat ka dei kaba ïadei bad ka National Green Tribunal (NGT), ka kynhun aiñ kaba laitluid, bad u la buh jingkylli hato tang ki jingpynthikna saiñ pyrthei ki lah ban pynbeit ïa ka kam kaba donkam ruh ban weng ïa ki jingeh ha ka liang ka aiñ.
“Ngam tip shaphang ki jingpynthikna jong ka sorkar bad ka ïingbishar. Kaei kaba don hapdeng ka sorkar bad ka ïingbishar, ngam tip. Baroh ki lah ban ai jingkular, hynrei ngin sa peit ïa ka jingmih”, u la ong.
U Dr. Kharlukhi u la ong ba un pdiang sngewbha ïa kano kano ka jingpyrshang kaba shisha ban pynim biang ïa ka jingtih dewïong ha Jaiñtia Hills, hynrei u la ban jur ba dei ban pyrkhat ruh ïa ka jingai jingmut jong ki paidbah kiba shah ktah ha katei ka mat.
“Ngan kmen shibun lada ki lah shisha ban pynim biang ïa ka jingtih dewïong ha Jaiñtia Hills. Hynrei ha kajuh ka por, nga tharai ïa kane ka jingkylli dei ban buh ïa ki paidbah ka Jaiñtia Hills kyllum, hato ki sngewkmen ïa ka rukom ba ka sorkar jylla ka leh ïa u dewïong?” u la buh jingkylli.